कनकाई खबर \ झापा क्षेत्र नं. ४ बाट प्रतिनिधि सभा सदस्यका लौरो अभियानका स्वतन्त्र उम्मेद्वार युक्तप्रसाद भेट्वालले चुनावी घोषणा पत्र सार्वजनिक गरेका छन् ।
झापाको सुरुङ्गामा पत्रकार भेटघाट गरी आफ्नो चुनावी घोषणा पत्र सार्वजनिक गरेका हुन् । घोषण पत्रमा उनले आफ्ना प्रतिबद्धता र क्षेत्र नं. ४ मा गर्नु पर्ने कामहरु समेटेका छन् । भेट्वालले घोषणा पत्रमा मेरो उम्मेदवारी किन ?, हामी कसरी काम गर्छौं ?, दल पुनर्संरचना, राज्य पुनर्संरचना, राष्ट्रिय आवश्यकता पहिचान, जैविक अधिकार, आर्थिक संरचना, सामाजिक संरचना, शासकीय स्वरुप, शिक्षा प्रणाली, कृषि, स्वास्थ्य सेवा, रोजगारी, विकास नीति, विदेश नीति लगायतका विषय समेटेका छन् ।
“व्यावहारीक शिक्षा र आधुनिक शिक्षा अहिलेको आवश्यकता हो”, उनले भने, “आधुनिक कृषि पनि जरुरी छ ।” विकास नीति पनि आफ्नै खालको हुनुपर्ने उनको भनाइ छ । मुलुकमा व्याप्त नीतिगत भ्रष्टाचार अन्त्य गर्न सके मात्र सुशासन र विकास सम्भव हुने उनको भनाई छ ।
त्यस्तै, प्रदेश सभा ४ (२) का स्वतन्त्र उम्मेद्वार केशव बजगाईंले १४ बुँदे प्रतिबद्धता सार्वजनिक गरेका छन् । उनले जनताको सोच अनुरुप विकास हुन नसकेकाले देशभर स्वतन्त्रको लहर आएको बताए ।
“स्थानीयसँगै प्रतिनिधिसभा र प्रदेशसभामा स्वतन्त्रको प्रतिनिधित्व हुन जरुरी छ”, उनले भने, “सरकार र सदनको नकारात्मकता हटाएर सकारात्मक कुरालाई अगाडि बढाउन जरुरी छ ।”
निर्वाचन परिचालन समितिका संयोजक शेरबहादुर थापाको अध्यक्षतामा सम्पन्न कार्यक्रममा समानुपातिक तर्फका उम्मेद्वार लक्ष्मीप्रसाद गुरुङ्, हरी धिमाल, मोहन राजवंशी, विनिशा मुर्मू सहितको उपस्थिती रहेको थियो । हाम्रो नेपाली पार्टीका केन्द्रिय प्रवक्ता रोहन कार्कीले शुभकामना मन्तव्य राखेको कार्यक्रमको लौरो अभियानका अभियन्ता दिनानाथ खतिवडाले संचालन गरेका थिए ।
