कनकाई खबर / झापाको कनकाई नगरपालिकाले विद्युतीय सवारी साधनको प्रयोगलाई प्राथमिक्ता दिने भएको छ ।
जनप्रतिनिधिले पाउँने सवारी साधनको सुविधा उपभोग गर्नकालागि विद्युतबाट चल्ने एक \ एक थान मोटरसाइकल र स्कुटर खरिद गरिसकेको कनकाई नगरपालिकाले आवश्यक्ता र अवस्था हेरेर अन्य साना सवारी साधनको खरिद गर्नु पर्दा विद्युतीय सवारी साधनलाई नै पहिलो प्राथमिक्ता दिने जनाएको छ । स्थानीय सरकार प्रमुखका रुपमा कनकाई नगरपालिकामा पहिलो पटक निर्वाचित भएसँगै विद्युतीय सवारी साधन खरिद गरी आन्तरीक खर्चलाई कम गर्ने योजना बनाएका कनकाई नगरपालिकाका प्रमुख राजेन्द्रकुमार पोखरेलको योजना यस पटक मात्र पूरा भएको छ ।
नगर प्रमुख पोखरेलको पहिलो कार्यकालको समयमा विद्युतको अवस्था पनि कमजोर भएका कारण बाध्यात्मक अवस्थामा पेट्रोलबाट चल्ने साना सवारी साधन खरिद गरिएको बताइएको छ । विद्युतीय सवारी साधन खरिदको विषयमा पहिलो कार्यकालमा जनभावना बुझेर ठूला सवारी साधन समेत खरिद नगरिएको नगर प्रमुख पोखरेल बताउँछन् ।
यस पटक पहिलो चरणमा परिक्षणका रुपमा दुईवटा साना सवारी साधन खरिद गरेको बताउँदै कनकाई नगर प्रमुख पोखरेलले पछिल्लो समय नेपालमा उत्पादन भएको बढी भन्दा बढी विद्युतलाई अधिक्तम रुपमा प्रयोगमा आओस् भन्ने सोचका साथ विद्युतीय सवारी साधन खरिद गरिएको बताएका छन् । कनकाई नगरपालिकाले विद्युतबाट चल्ने साना सवारी साधन खरिदकालागि नितीगत रुपमा नै व्यवस्था गरेको नगर प्रमुख पोखरेल बताउँछन् ।
पेट्रोलियम पदार्थ देशभित्र आयात गर्दा व्यापार घाटा चुलिएको अवस्थालाई मध्यनजर गर्दै स्वदेशमै उत्पादन भएको विद्युतलाई अधिक्तम रुपमा प्रयोग गर्दा व्यपार घाटा कम हुन सक्ने भन्दै नगर प्रमुख पोखरेलले विद्युतीय सवारी साधनको प्रयोगमा जोड दिएको बताएका छन् । नगर प्रमुख पोखरेल भन्छन्, “वातावरण दुषित भएकै कारण हाम्रो सुन्दर देश नेपाल दिनप्रतिदिन कुरुप बन्दै गएकाले वातावरणको प्रदुषणलाई समेत न्युनीकरण गर्ने उद्येश्यका साथ कनकाई नगरपालिकामा विद्युती सवारी साधनलाई प्राथमिक्ता दिइएको हो ।”
