कनकाई / झापाको कनकाई नगरको विरिङ् नदी किनारमा सामुहिक पूजाअर्चनाका साथ सिरुवा घाटोसरी कार्यक्रम मनाइएको छ ।
विशेष गरी राजवंशी समुदायले प्राथमिक्ताका साथ नयाँ वर्षको सुरुवातसँगै मनाउँने गरेको सिरुवा पर्वको धार्मिक साथै वैज्ञानीक महत्व समेत रहेको वताइएको छ । घाटोसरी विश्वभरि रहेका कोच राजवंशीहरुको महान पर्व भएकाले यो पर्व हरेक वर्षको बैशाख २ गतेका दिन महत्वका साथ मनाउँने परम्परा भएको वताइएको छ । कार्यक्रमको औचित्यमाथि प्रकाश पार्दै आयोजक संस्थाका सदस्य अरुण राजवंशीले घाटोसरी पर्वमा कोच समुदायका महिलाहरु खोलाको किनारमा गएर पुजाअर्चना गर्नुका साथै घाटोसरी गीत गाउँने परम्परा रहेको वताएका छन् ।
यस पर्वको पहिलो दिन बैशाख १ गते पानी सिरुवा, दोस्रो दिन घाटो सरी र तेस्रो दिन रङ्ग सिरुवा मनाउँने परम्परा रहेको राजवंशीले वताए । नेपालमा लोप हुन लागेका विभिन्न जातजातीहरुको आफ्नो धर्मसंस्कृति, भाषाभाषीहरुको संरक्षणका लागि सवै जाती एक जुट हुनु पर्ने तर्फ जोड दिँदै कार्यक्रमका प्रमुख अतिथी झापा क्षेत्र नं.२ का प्रदेश सभा सदस्य एकराज कार्कीले राजवंशी समुदायको भावनालाई राज्यले सधैं सम्मान गर्ने वताएका छन् ।
राष्ट्रिय पोशाक साडी चोलोमा सजिएका राजवंशी समुदायका महिलाहरुले कार्यक्रमका अतिथीहरुसँग सामुहिक घाटोसरी गीतमा नृत्य समेत प्रस्तुत गरेका थिए । आयोजक संस्थाका तर्फवाट कार्यक्रमका प्रमुख अतिथी लगायत सम्पूर्ण अतिथीहरुलाई माटोको टिका लगाएर कार्यक्रमको उद्घाटन गरिएको आयोजक समितिका सदस्य धर्मलाल राजवंशीले वताएका छन् ।
कनकाई नगरपालिका ९ स्थित आयोजक संस्था सामुहिक सिरुवा घाटोसरी कोचिला महिला फन्टकी अध्यक्ष मीना राजवंशीको सभापतित्वमा सम्पन्न कार्यक्रममा स्थानीय जनप्रतिनिधीहरु, विभिन्न जातजाीको नेतृत्व गर्ने जातीय संस्थाका प्रमुख तथा प्रतिनिधीहरु, सामाजिक संघसंस्थाका प्रतिनिधी लगायत राजवंशी महिला समुदायको वाक्लो उपस्थिती रहेको कनकाई नगर वडा नं. ९ का अध्यक्ष प्रेम राजवंशीले वताएका छन् । कार्यक्रममा झापा क्षेत्र नं.४ ‘ख’ का प्रदेश सभा सदस्य हिराकुमार थापा, कनकाई नगरपालिकाका प्रमुख राजेन्द्रकुमार पोखरेल, उपप्रमुख मन्जु प्रसार्इँ, नेपाल आदिवासी जनजाती महासंघ झापाका सचिव विरेन मेचे लगायतले मन्तव्य राखेका थिए ।
