कनकाई खबर \ नेपाली कांग्रेसको भातृ संगठन नेपाल महिला संघ कनकाई नगर समितिको सभापतिमा सर्वसम्मत चयन भएकी रेणुका उप्रेती मैनालीले आगामी दिनमा राजनीतिको माध्यमबाट समाज रुपान्तरणमा भूमिका खेल्ने प्रतिवद्धता जनाएकी छन् ।
महिला संघ नगर सभापतिमा सर्वसम्मत रुपमा चयन भएकी मैनालीले महिलाहरु एक जुट भएर अघि बढ्ने हो भने समाज रुपान्तरणमा कुनै समस्या नहुने भन्दै यस्तो प्रतिवद्धता जनाएकी हुन् । कनकाई–३ निवासी मैनालीको नेतृत्वमा १८ सदस्यीय नगर समिति सर्वसम्मत रुपमा चयन भएको हो ।
लामो समय सम्म शिक्षण पेशामा आबद्ध भएर शैक्षिक साथै सामाजिक क्षेत्रमा समेत अनुभव बटुलीसकेकी मैनाली रोटरी क्लव अफ सुरुङ्गाकी कार्यसमिति सदस्य समेत हुन् । विगत २२ वर्ष अघि २०५७ सालदेखि १७ वर्ष सम्म सुरुङ्गास्थित हरिकुल उच्च मावि साथै अघिल्ला ५ वर्ष मेरीगोल्ड अंग्रेजी माविमा शिक्षण पेशामा आवद्ध मैनालीले सोही समयमा विर्तामोडस्थित कनकाई क्याम्पसमा समेत ५ वर्ष सम्म अध्यापन गर्न भ्याएकी थिइन् । कनकाई बहुमुखी क्याम्पस सुरुङ्गाबाट नेपाली विषयमा स्नातकोत्तर तह सम्मको अध्ययन गरेकी मैनालीले अबको समय राजनीतिको माध्यमबाट समाज रुपान्तरणमा भूमिका खेल्ने बताएकी हुन् । राजनीतिक दलहरुको नेतृत्व तहमा महिलाको सहभागिता कमजोर भएकै कारण पछिल्लो समय राजनीतिप्रति जनताको विश्वास घट्दै गएको बताउँदै मैनालीले हरेक क्षेत्रको नेतृत्व तहमा अब महिलाहरुको सक्रियता आवश्यक रहेको बताइन् ।
मैनालीको नेतृत्वमा गठन भएको १८ सदस्यीय समितिको उपसभापतीमा कविता श्रेष्ठ र सीता खड्का, सचिवमा गीता उप्रेती र संगिता भुजेल, सह–सचिवमा सोनामणी हेमरम र रचना प्रसाईँ साथै कोषाध्यक्षमा सरला तामाङ सर्वसम्मत रुपमा चयन भएका छन् । त्यस्तै सदस्यहरुमा क्रमशः तारा कोईराला, मैया श्रेष्ठ, सिता सुजी, अनिता श्रेष्ठ, मुना अछामी, सारदा घिमिरे, तारा थपलिया, मंगलसरी राजवंसी र मुना उप्रेती चयन भएका छन् ।
नेपाली कांग्रेस नगर सभापती दुर्गाप्रसाद प्रसाईको सभापतित्व एवं पार्टीका जिल्ला सभापति देउकुमार थेवेको प्रमुख आतिथ्यमा सम्पन्न कार्यक्रममा महाधिवेशन प्रतिनिधि भिम राजवंशी, धनमाया चिमयरिया र सीता थेवेको आतिथ्यता रहेको थियो । नगर उपप्रमुख आशा शर्मा शिवाकोटी, जिल्ला सदस्य लीला चिमरिया, कविता बस्नेत लगायतले शुभकामना मन्तव्य राखेको कार्यक्रममा नव निर्वाचित सभापती रेणुका उप्रेती मैनालीले स्वागत गरेकी थिइन् ।
नगर सचिव रेणुप्रसाद कडेलले संचालन गरेको औपचारिक कार्यक्रममा नगर सभापती दुर्गाप्रसाद प्रसाईले औचित्यमाथी प्रकाश पारेका थिए । कार्यक्रममा समिति गठनको सहजीकरण नेपाली कांग्रेस नगर सचिव कडेल, कनकाई.–१ का वडासभापती मनोज बस्नेत, महिलासंघ क्षेत्रीय सभापती कविता बस्नेत , जिल्ला सदस्य झुमा वेडारी लगायतले गरेका थिए ।
कार्यक्रमका प्रमुख अतिथि देउकुमार थेवेले प्रदेश र संघको आसन्न निर्वाचनमा आम दिदी–बहिनी आ–आफ्नो ठाँउबाट खटेर लाग्नुपर्ने र सबै तवरबाट सक्रियता देखिएमा आगामी मंसिर ४ को चुनावमा विजयी प्राप्त गर्न कठिन नहुने बताए । सभापती थेवेले अब झापा ४ को मुहार फेर्नकालागि एक मात्र शक्तिशाली पार्टी नेपाली कांग्रेस अघि बढिसकेको हुनाले पार्टीलाई जिताएर यहाँको समग्र विकासको नेतृत्व गर्न दिदी बहिनीको अहम भुमिका हुने बताए । त्यस्तै आधा आकाश ढाकेको महिला शक्तिले यो पटकको निर्वाचनमा नेपाली कांग्रेसलाई बिजयी गराउने उनले विश्वास व्यक्त गरे ।
शुक्रबार सम्पन्न औपचारिक कार्यक्रममा कनकाई नगरपालिकाकी उपप्रमुख समेत रहेकी कांग्रेसनेतृ आशा शिवाकोटीले शुभकामना सहित नवनिर्वाचित सबैलाई धन्यबाद ज्ञापन गरेकी थिइन् ।
