कनकाई खबर \ आठौं संविधान दिवसको अवसरमा झापाको कनकाई नगरपालिकाले एक विशेष समारोहका विच लोकतान्त्रिक जनआन्दोलनका शहिदको स्मरण गर्दै नेपालको राष्ट्रिय झण्डा फहराएको छ ।
संविधान सभाबाट संविधान जारी गर्ने नेपाली जनताको दशकौँदेखिको सपना साकार भएको दिन असोज ३ गते सात वर्ष पूरा भएको अवसरमा आयोजित समारोहलाई सम्बोधन गर्दै कनकाई नगरपालिकाका प्रमुख राजेन्द्र पोखरेलले तत्कालीन समयमा अनेकौँ चुनौतीका बीच संविधान जारी हुनु आफैँमा एउटा महत्वपूर्ण उपलब्धि भएको बताए ।
नगर प्रमुख पोखरेलले संविधान प्राप्तीका लागि ज्यानको बलिदानी दिने शहिदहरुको चर्चा गर्दै शहिदले देखेका सपनालाई साकार पार्ने अभियानमा बिगत ७२ बर्षसम्म हुन नसकेका धेरै काम ५ बर्षको अवधिमा सम्पन्न भएको बताए । नगर प्रमुख पोखरेलले ५ वर्षको अवधिमा सोचे जतीको कार्य सम्पन्न गर्न नसकेको स्विकार्दै अबको अभियान नगरवासीको समृद्धि तर्फ अघि बढेको बताए ।
नगर क्षेत्रमा बाटोघाटो, युवा स्वरोजगार, शिक्षा जस्ता कुरामा धेरै प्रगति भएको बताउँदै नगर प्रमुख पोखरेलले स्वास्थ्यका क्षेत्रमा केही सुधार गर्दै १ हजार ५ सय घरधुरीलाई स्वास्थ्य बिमा गराएको जानकारी दिए ।
कनकाई नगरपालिकाकी उपप्रमुख आशा शर्मा शिवाकोटीले स्वागत गरेको कार्यक्रममा नेकपा (माओवादी केन्द्र) नगर उपाध्यक्ष दिलिप घतानी, नेपाली कांग्रेस नगर सचिव रेणुप्रसाद कँडेल लगायतले शुभकामना मन्तव्य राखेका थिए भने कार्यक्रमको सञ्चालन नगरका प्रमुख प्रशासकीय अधिकृत मोहनप्रसाद न्यौपानेले गरेका थिए ।
कार्यक्रममा नगरका ९ वटैं वडाका वडाध्यक्ष, कार्यपालिका सदस्य, वडा सदस्य, कर्मचारी, प्रहरी, नगरका राजनीतिक दलका प्रमुख तथा प्रतिनिधि लगायतको उपस्थिति रहेको थियो ।
