काठमाडौं \ नेकपा एमालेका सांसद एलपी साँवा लिम्बूको परिचय बदलिएको छ ।
अन्तिम संसद बैठक बसेकै दिन साँवाको गीत चौरीको चाम्रो छुर्पी २ (राम्रो सोचे राम्रो नै देखिन्छ) सार्वजनिक भएको छ । गीत चौरीको चाम्रो छुर्पी १ युट्युबमा तीन करोड ६३ लाख भन्दा बढीले हेरिसकेका छन् ।
काठमाडौंमा शुक्रबार संविधानसभा अध्यक्ष एवं नेकपा एमाले संसदीय दलका उपनेता सुवासचन्द्र नेम्वाङले गीत सार्वजनिक गर्नुभयो । नेम्वाङले गीत सार्वजनिक गर्दै सफलताको शुभकामना दिनुभयो ।
आफू संगीत भनेपछि हुरुक्कै हुने गरेको बताउँदै नेम्वाङले भन्नुभयो, ‘एलपीजीले लेख्नुभएको गीतको सन्देश वास्तवमै उत्कृष्ट छ ।’ साँवाको स्वभाव भन्दा पृथक शब्दसहित गीत आएको उहाँको भनाइ थियो । ‘एलपीजीको बोलीचाली सिधा सिधा खालको छ, मान्छेले रुखो बोल्छ पनि भन्छन्, तर गीतमा प्रयोग भएका शब्द वास्तवमै कोमल छन्,’ उहाँको भनाइ थियो ।
साँवाले चौरीको चाम्रो छुर्पी १ जस्तै नयाँ गीतलाई पनि दर्शक र स्रोताले मन पराइदिने विश्वास व्यक्त गर्नुभयो ।
गायक टंक बुढाथोकी र अशोक दर्जीले पनि शब्द, संगीत र भिडियोमा धेरै मिहिनेत गरिएको भन्दै राम्रो प्रतिक्रिया आउने विश्वास व्यक्त गर्नुभयो । गीतमा टंक, अशोकसहित बिक्रम थापा र अर्का बाल गायक एआर बुढाथोकीले गीत गाएका छन् ।
