कनकाई खबर \ झापाको सुरुङ्गामा ५८ औं वालदिवस विविध साँस्कृतिक प्रस्तुतीसहित भव्य रुपमा सम्पन्न भएको छ ।
कनकाई नगरपालिकाको समन्वय एवं कनकाई नगर वाल संजालको आयोजनामा सम्पन कार्यक्रममा नगर क्षेत्रका मावि तह स्तरीय नृत्य प्रतियोगिता सम्पन्न भएको हो । कनकाई नगर क्षेत्रका निजी तथा सामुदायिक गरी दशवटा विद्यालयको सहभागीता रहेको प्रतियोगितात्मक नृत्यमा सुरुङ्गास्थित ग्लोबल एडुकेयर एकाडेमीले पहिलो उपाधी हात पारेको छ । प्रतियोगितामा सहभागी मध्ये कनकाई मावि द्वितीय, श्री हरिकुल मावि तृतीय र झापा मेरिगोल्ड मावि शान्त्वना भएका छन । नृत्य निर्देशक द्वय अमन गुप्ता र दिवस कार्कीले निर्णायकको भुमिका निर्वाह गरेको प्रतियोगितामा विजेता उपविजेतालाई नगर वाल कल्याण अधिकारी उमानाथ ढकाल र वाल संजालका अध्यक्ष अभिषेक मिश्रले ट्रफी , मेडल र प्रमाण पत्र वितरण गरे ।
सांस्कृतिक प्रस्तुतीसहित गीत , कविता र अन्य नृत्य समेत प्रस्तुत गरिएको कार्यक्रममा कनकाई माविका कक्षा ११ र १२ का विद्यार्थीबाट विज्ञान प्रदर्शनी समेत गरिएको थियो । “वाल मैत्री समाजको आधार , जिम्मेवार परिवार , उत्तरदायी सरकार” भन्ने नाराका साथ अघि बढेको नगर वाल संजालले स्थानीय स्तरमा वालवालिकासँग सम्बन्धित विभिन्न सचेतनामूलक गतिविधि संचालन गर्दै आएको छ ।
कनकाई नगर वाल संजालका अध्यक्ष अभिषेक मिश्रको सभापतित्व एवं कनकाई नगरपालिकाका प्रमुख राजेन्द्र पोखरेलको प्रमुख आतिथ्य रहेको कार्यक्रममा विभिन्न संघसंस्थाका प्रमुख तथा प्रतिनिधि , जनप्रतिनिधि, वाल संजालका पूर्व पदाधिकारीहरु , शिक्षक प्रतिनिधिसहितको उपस्थिती रहेको थियो ।
नगर वाल संजालकी कोषाध्यक्ष गंगा दाहालले स्वागत गरेको कार्यक्रममा नगर प्रमुख पोखरेलसहित उपप्रमुख आशा शिवाकोटी, कनकाई ४ का वडाअध्यक्ष रोशन सुवेदी, कनकाई माविका प्रअ कर्णबहादुर डाँगी , सामाजिक ब्यक्तित्व नेत्र प्रसाई लगायतले शुभकामना मन्तब्य राख्दै वालवालिकाको क्षेत्रमा नगरस्तरीय वाल संजालले गर्दै आएको सचेतनामूलक गतिविधिको प्रशंसा गरेका थिए ।
वाल संजालको सक्रियतामा लागु औषध एवं दुरव्यसनीको न्युनीकरण साथै मानव वेचविखनका विषयमा समेत सचेतनामूलक गतिविधि हुँदै आएको बताइएको छ । औपचारिक कार्यक्रमको संचालन रोशन प्रसाईं र अश्लेसा कडेंलले साथै सांस्कृतिक कार्यक्रमको संचालन अभिषेक बुढाथोकी र समिर विश्वकर्माले गरेका थिए ।
