सुरुङ्गा /दोहा कतारमा २२ दिन अघि निधन भएका कनकाई नगर ५ तुलसीवारी निवासी ३६ वर्षिय सुरेश भेट्वालको शुक्रवार कनकाई माईमा दाहसंस्कार गरिएको छ ।
एघार वर्ष अघिदेखी ग्रुपफोर सेक्युरिटीमा कार्यरत भेट्वाल दोहा कतारस्थित अस्ताद प्रोजेक्ट विन महम्मद विल्डीङ्मा कार्यरत थिए । अघिल्लो महिनाको फागुन २९ गते राती १० वजेसम्म तुलसीवारीस्थित निजी निवासमा श्रीमति मन्जुसँग सधैं झैं भिडीयो कलवाट हाँसो खुशीका साथ राम्रैसँग कुराकानी गरेर सुतेका भेट्वाल उज्यालो हुँदा ३० गते विहान आफ्नै कोठामा शंकास्पद तरिकाले मृतअवस्थामा फेला परेका थिए । कोठामा ६ जना साथीहरु मिलेर वस्दै आएको भएपनि दुईजना डिउटीमा रहेकाले त्यो रात भेट्वालसहित चारजना सुतेको कोठामा उनी झुन्डीएको अवस्थामा फेला पर्नुले घटनालाई रहस्यमय वनाएको मृतक सुरेशका भाइ गोविन्द भेट्वालले वताउँदै आएका थिए ।
लामो समय वितिसक्दा पनि घटनाको वारेमा सत्य तथ्य सार्वजनिक नहुँदा दिनप्रतिदिन परिवारलाई तनाव बढ्दै गएको थियो । घटना भएको लामो समयपछि कतार सरकारले मृतकको पोष्ट मार्टमको रिपोर्टका साथ आवश्यक प्रक्रिया पूरा गरेर मात्र भेट्वालको शव नेपाल पठाएको वताइएको छ । विहिवार विहान काठमाण्डौवाट प्रक्रिया पूरा गरेर भेट्वालको शव राती अवेला झापा तुलसीवारीस्थित भेट्वाल निवासमा ल्याइएको हो ।
इलामको दानावारी हालको महमाई नगरपालिका ४ निवासी नरनाथ र चेवनकुमारी दहालकी साइली छोरी मन्जु ६ वर्ष अघि २०६९ सालको असार १० गतेका दिन १९ वर्षकै उमेरमा कनकाई ५ स्थित तुलसीवारी निवासी लक्ष्मीप्रसाद र विष्णुमाया भेट्वालका साइला छोरा सुरेश भेट्वालसँग विवाह वन्धनमा वाँधिएकी थिइन् । विवाह हुनु भन्दा पाँच वर्ष अघिदेखी नै सुरेश वैदेशिक रोजगारीका लागि दोहा कतार गएका थिए ।
विवाहका लागि दुई महिनाको विदामा आएका सुरेशले विवाहपछि एक महिनाकी वेहुली वावुआमाका साथमा छाडेर आँफू परदेश तर्फ लागेका थिए । दश महिनापछि २०७० सालको वैशाख ५ गतेका दिन छोराको जन्म भएपछि सुत्केरी मन्जुलाई हस्पीटलवाट घरमा ल्याएसँगै सोही दिन वेलुका सुरेश कतारवाट घर आएर दुई महिना वसेका थिए ।
त्यसपछाडी यस अघि २०७३ सालको चैतमा दुई महिनाको विदाको समय घर परिवारसँग विताएर गएका सुरेश अव मन्जुसँग मात्र नभई यो संसारवाट नै सदाका लागि विदा भएको खबर आएपछि मन्जु भुँइमा ढलेकी थिइन् । अरु दुई वर्ष विदेशमा वसेपछि आँफ्नो व्यवहार केही सहज हुने विश्वास लिएका सुरेशले त्यसपछिका दिनमा स्वदेशमै आएर परिवारका साथ गाईपालन र कुखुरा फर्म खोल्ने र श्रीमतिका लागि छुट्टै पसल संचालन गरिदिने भावि योजना सुनाउँने गरेको वताइएको छ । विदेश गएर आर्जन गरेको पैशाले कनकाई ५ स्थित तुलसीवारीमा चार वर्ष अघि किनेको घरमा सुरेशले आफ्नी श्रीमति मन्जु र उनको पाँच वर्षको छोरा सुमनलाई व्यवस्थापन गरेका थिए । शुक्रवार कनकाई माईमा भएको अन्तिम दाहसंस्कारपछि स्व.भेट्वालको परिवार तुलसीवारीस्थित आफ्नै घरमा काजक्रियामा जुटेको वताइएको छ ।
