कनकाई खबर \ ग्रामिण क्षेत्रमा भएको सडक विस्तारसँगै हरेक दिन जस्तो सडक दुर्घटनाबाट ज्यान गुमाउनेको संख्या समेत बढ्दै गएको छ ।
ग्रामिण क्षेत्रमा हुने यस किसिमको सडक दुर्घटना न्युनीकरणकालागि कनकाई नगरस्तरीय खेलकुद महासंघले सक्रियता देखाएको छ । कनकाई–३ स्थित कनकाई टोल सडक खण्डमा दुर्घटनाको जोखिम बढेपछि कनकाई खेलकुद महासंघले पहिलो चरणमा सडक क्षेत्रको चौवाटोमा मिनि राउण्डबोर्ड निर्माण गरेर सडक दुर्घटना न्यूनिकरणका लागि सचेतना जगाएको महासंघ कनकाईका अध्यक्ष गोविन्द सुवेदी बताउँछन् ।
गत साउन ४ गते सडक दुर्घटनामा परेर झापा–६ का राजेश कार्कीको मृत्यु भएसँगै दुर्घटनाको जोखिम बढेको भन्दै महासंघले दुर्घटना न्युनीकरणका लागि सहयोग गर्न सरोकारवाला निकायहरुसँग समेत आग्रह गरेको महासंघ अध्यक्ष सुवेदीले जानकारी दिए ।
प्रत्येक नागरिकले सडक—बाटोमा हिँड्दा सावधानी अपनाउने हो भने दुर्घटना न्युनीकरणमा थप सहयोग पुग्ने विश्वास व्यक्त गर्दै कनकाई ३ का वडाअध्यक्ष युवराज चौलागाईँले ग्रामिण क्षेत्रमा हुने सडक दुर्घटना न्युनीकरणकालागि वडासमिति समेत गम्भिर रहेको बताए । दुर्घटना बढी हुने ग्रामिण सडक खण्डमा वडासमितिले चाँडै थप नयाँ कार्ययोजना संचालनमा ल्याउँने वडाअध्यक्ष चौलागाईँले प्रतिवद्धता जनाए ।
