कनकाई खबर \ झापा क्षेत्र नं.४(ख) का प्रदेश सभा सदस्य हिराकुमार थापाले अब संघीय सांसद भएर जनताको सेवा गर्ने रहर भएको बताएका छन् ।
प्रदेश नं. १ को भुमिसुधार तथा कृषि मन्त्रीको समेत अनुभव प्राप्त प्रदेशसभा सदस्य थापाले आफ्नो ५ बर्षे कार्यकालमा भए गरेका बिकास निर्माणका कार्यको सार्वजनिकीकरण गर्दै मंगलवार सुरुङ्गामा पत्रकार भेटघाटका क्रममा आगामी निर्वाचनमा प्रतिनिधिसभाको उम्मेद्वार बन्ने आकांक्ष ब्यक्त गरेका हुन् ।
पार्टीको निर्णयलाई आत्मसाथ गर्दै आगामी मंसिरमा हुने प्रतिनिधिसभाको निर्वाचनमा झापा क्षेत्र नं.४ मा नेकपा एमालेका तर्फबाट उम्मेद्वारी दिने संकेत गर्दै प्रदेश सभा सदस्य थापाले हालसम्म आफुले प्राप्त गरेको अनुभवका आधारमा एकपल्ट संघीय सांसद भएर जनताको सेवा गर्ने रहर जागेको बताएका छन् ।
प्रदेशसभा सदस्य थापाले दोहोर्याएर अव प्रदेशमा नजाने बताउँदै भन,े ‘अवसर नपाउने साथीहरुकालागि ठाउँ खाली गरिदिएको छु’ । उनले भने,‘यसैगरी मलाई पनि संघीय सांसदको ठाउँ खाली गरिदिनु पर्छ ।’ प्रदेशसभा सदस्य थापाले प्रदेश सांसद भएर एक खालको अनुभव प्राप्त गरेको बताउँदै प्रतिनिधिसभामा अब सांंसद हुने उमेर पनि पुगेको बताए ।
प्रदेश १ को नामाकरण हुन नसकेको बिषयमा पत्रकारहरुले राखेको जिज्ञासामा प्रदेशसभा सदस्य थापाले नेकपा एमाले, नेकपा (माओवादी) केन्द्र, नेपाली कांग्रेससहित अन्य दलका सांसदहरुमा एकमत नभएका कारण नामाकरण हुन नसकेको बताएका छन् ।
प्रदेशसभा सदस्य थापाको अध्यक्षतामा भएको पत्रकार भेटघाटमा नेकपा एमाले सल्लाहकार परिषद सदस्य बालकृष्ण मैनालीको प्रमुख आतिथ्य रहेको थियो । थापाका पूर्व स्वकीय सचिव बिनोद रानामगरले सञ्चालन गरेको कार्यक्रममा पार्टीका नेता तथा कार्यकर्ताको उपस्थिति रहेको थियो । पत्रकार भेटघाटका क्रममा सांसद थापाले आर्थिक बर्ष २०७४÷०७५ देखि २०७९÷०८० सम्मका बिकास निर्माणका कार्यहरु सार्वजनिक गरेका थिए ।
