कनकाई खबर \ नेपालमै पहिलो पटक सामुदायिक वनमा आधारित चलचित्र हाम्रो जंगल निर्माणपछि सार्वजनिक भएको छ ।
वनहरु समुदायमा हस्तान्तरण भएसँगै भए गरेका प्रगतिको कथामा आधारित चलचित्रलाई वृत्तचित्रको रुपमा वन दिवशको अवसर पारेर जामुनवारी सामुदायिक वन समुहको सभा हलबाट प्रदर्शनको सुरुवात गरिएको हो ।
‘हाम्रो जंगल’ नामक एक घण्टाको उक्त वृत्तचित्रको छायांकन पूरा गरी झापाको जामुनवारी सामुदायिक वन समूह एवं जामुनखाडी सिमसार तथा पर्यटकीय क्षेत्रमा सार्वजनिक गरिएको छ । सामुदायिक वन उपभोक्ता महासंघ नेपालको प्रस्तुती र माइबेनी फिल्मस् प्रालिको ब्यानरमा निर्माण भएको वृत्तचित्र सातौँ वन दिवसको सन्दर्भ पारेर सार्वजनिक गरिएको हो ।
सामुदायिक वन उपभोक्ता महासंघ झापाद्वारा कनकाई नगरपालिका–२÷१ स्थित जामुनवारी सामुदायिक वन समूहको सभाहलमा आयोजित कार्यक्रममा वृक्षारोपणसहित वन नियमावली सम्बन्धी अन्तरक्रिया समेत गरिएको थियो । ठूलो पर्दाको चलचित्र निर्देशक विजय केरुङले कथा तथा निर्देशन गरेको उक्त चलचित्र सामुदायिक वन समूहको क्षेत्रमा छायांकन गरिएको छ । मेचीनगर निवासी निर्देशक केरुङले निर्देशन गरेको माझीदाई, आमाको काख, हामी शरणार्थी चलचित्र यस अघि नै हिट भइसकेका छन् ।
तिनै सफल निर्देशक केरुङले सामुदायिक वनमा आधारित चलचित्र बनाएका हुन् । सामुदायिक वनका गतिविधिलाई कथामा समेट्न खोजिएको उनले बताए । ‘सामुदायिक वनहरु यहाँसम्म आइपुग्न उपभोक्ताको ठूलो हात छ,’ उनले भने, ‘यही सफलतालाई पर्दामा देखाउने जमर्को गरेको छु ।’
चलचित्रको मुख्य भूमिकामा कलाकारहरू सुभास मेचे, समिता गिरी, सुरवीर पण्डित, पुकार भट्टराई र विपिन प्रसाईं छन् । त्यस्तै, कृष्ण कोइराला, विक्रम श्रेष्ठ लगायतका कलाकारको पनि अभिनय छ । निर्माता विस्मार्क लिम्बूका अनुसार वृत्तचित्रलाई देशभरका २२ हजार ४ सय सामुदायिक वनका उपभोक्ता समूह मार्फत उपभोक्तालाई देखाइनेछ ।
महासंघ झापाका अध्यक्ष वेदप्रकाश भण्डारीको अध्यक्षता एवम् केन्द्रीय सदस्य संगीता थापाको प्रमुख आतिथ्यमा भएको कार्यक्रममा स्वागत जिल्ला उपाध्यक्ष प्रेम घिमिरेले गरेका थिए । कार्यक्रममा जामुनवारी सामुदायिक वन समुहका अध्यक्ष ख्याम सिटौला, कनकाई नगरपालिका २ का वडाअध्यक्ष प्रताप राई लगायातको आतिथ्य रहेको थियो ।
