कनकाई खबर \ झापाको कनकाई नगरपालिकाले कारितास नेपालसँगको सहकार्यमा युवालाई सिपमुलक तालिम प्रदान गर्दै स्वदेशमै आत्मनिर्भर बनाउँने अभियान संचालन गरेको छ ।
“जब सम्म युवाहरुलाई स्वरोजगार बनाउँन सकिदैन तब सम्म समृद्धिको सपना पूरा हुन सक्दैन”भन्ने कुरामा जोड दिँदै कनकाई नगरपालिकाका प्रमुख राजेन्द्र पोखरेलले युवा लक्षित कार्यक्रमलाई नगरपालिकाले अभियानका रुपमा अघि बढाएको बताए । दातृ संस्थाका रुपमा कारितास जापान साथै कनकाई नगरपालिकाको समन्वय रहेको सिपमुलक तालिम कार्यक्रम कारितास नेपालले आयोजना गरेको हो । समापन कार्यक्रमलाई सम्बोधन गर्दै नगर प्रमुख पोखरेलले तालिममा सहभागीहरुले आर्जन गरेको सिपलाई आफ्नो पुँजीका रुपमा लिनु पर्ने कुरामा जोड दिए ।
युवालाई सिप सिकाएर स्थानीय स्तरमै स्वरोजगार बनाउँने योजनाका साथ कनकाई नगरपालिकाले युवा लक्षित विभिन्न कार्यक्रम संचालन गर्दै आएको नगर प्रमुख पोखरेलले जानकारी दिए । स्थानीय सरकार नगरवासीको चौतर्फी हितकालागि सधैं गम्भिर रहेको भन्दै नगर प्रमुख पोखरेलले सबैबाट हरपल सकारात्मक साथै रचनात्मक सहयोगको अपेक्षा राख्ने गरेको बताए ।
“सुरक्षित वैदेशिक रोजगारको सुनिश्चितता र प्रवासीहरुको दिगो स्थानीय पुर्नस्थापना प्रवद्र्धन” परियोजनाद्वारा संचालित सिपमुलक तालिम कार्यक्रमबाट महिला र पुरुष गरी विभिन्न विधामा ३२जना युवा लाभान्वीत भएको कारितास नेपाल सुरक्षित वैदेशिक परियोजना कनकाईका प्रमुख विवेक शिवाकोटीले जानकारी दिए । तालिममा कनकाईको वडा नं.३, ४ र ८ का स्थानीय युवाहरुको सहभागीता रहेको बताइएको छ ।
कारितास नेपाल प्रादेशिक प्रवन्धक देवेन्द्र पोखरेलको सभापतित्वमा सुरुङ्गास्थित होटल क्विनमा सम्पन्न तालिममा दुई महिने आधारभुत झोला निर्माण तर्फ १२ जना, ३ सय ९० घण्टाको सामान्य कुक तर्फ १० जना साथै ३ सय ९० घण्टाकै विद्युतीय मोटर रिवान्डर तर्फ १० गरी ३२ जना लाभान्वीत भएको बताइएको छ । तालिमको प्रशिक्षकका रुपमा झोला तर्फ स्थानीय सहजकर्ता मीना खबास साथै विद्युत मोटर र कुक तर्फ झापा प्राविधिक शिक्षालयका सहजकर्ता क्रमशः दिपेन्द्र विमली र माधव पराजुलीले सहजीकरण गरेको परियोजना अधिकृत हिमालयन अधिकारीले जानकारी दिए ।
कार्यक्रममा कारितास नेपाल प्रादेशिक प्रवन्धक पोखरेलले तालिममा सहभागीहरुले सिकेको ज्ञान सिप मरेर जानु नहुने भन्दै आयआर्जनमुलक बन्न सकोस् भन्ने शुभकामना व्यक्त गरे । कारितास नेपालले होटल क्विनमा बुधबारदेखि तीन दिने आधारभुत व्यवसायीक योजना तर्जुमा छनौट तालिम समेत संचालन गरीरहेको कारितास नेपालको सुरक्षित वैदेशिक परियोजनाका होम भट्टराईले बताए । परियोजना अन्तर्गत कनकाईका प्रमुख विवेक शिवाकोटीको संचालन तथा परियोजना अधिकृत हिमालयन अधिकारीले स्वागत गरेको तालिम समापन कार्यक्रममा कनकाई ३ का वडाअध्यक्ष युवराज चौंलागाईँ, सहभागीका तर्फबाट मीना खबास र मीना पाठक सिटौलाले आआफ्नो अनुभव सुनाएका थिए ।
गैरनाफा मुलक संस्था कारितासले प्रशिक्षण मात्र नभई आवश्यक्ता र अवस्थालाई मध्यनजर गर्दै स्वास्थ्य सामाग्री, विऊविजन तथा अन्य सामाग्रीहरु पनि वितरण गर्दै आएको छ । कारितासले सिप सिक्नेहरुलाई आत्मनिर्भर मात्रै नभई आम्दानीको एउटा विकल्प समेत बनाउने गरी कार्यक्रम संचालन गरिरहेको बताइएको छ । कारितास नेपालले शहर केन्द्रीत कृषिलाई पनि सन् २०१७ देखि प्राथमिकतामा राखेको छ । शहरबासीलाई अर्गानिक र स्वच्छ तरकारी खुवाउने उद्देश्यले कारितासले काठमाडौँ, ललितपुर र पोखरामा कौसी खेती कार्यक्रम सञ्चालन गर्दै आएको छ । कौसी खेतीलाई पनि कारितास नेपालले महत्वपुर्ण परियोजनाको रुपमा अघि सारेको छ ।
नेपालको कृषिको विकास र व्यवसायिकीकरणमा पनि कारितास नेपालको भूमिका उल्लेखनीय रहेको बताइएको छ । कारितासले विभिन्न जिल्लामा स्थानीयसँगको सहकार्यमा सुरु गरेको होमस्टे सफलतापूर्वक सञ्चालन भइरहेको बताइएको छ । होमस्टेले बेरोजगार तथा विदेशबाट फर्किएकाहरुलाई स्वरोजगार बनाउन थप मद्दत पुग्ने जनाइएको छ ।
विश्वका १६८ देशमा फैलिएको गैरनाफामूलक संस्था कारितासको उपस्थिति नेपालमा पनि २०४७ सालदेखि रहेको छ । कारितास नेपालको नामबाट यो संस्थाले नेपालमा दैवी तथा प्राकृतिक प्रकोपको क्षेत्रमा थुप्रै कामहरु गर्दै आएको छ । विपत्तिमा परेका मानिसलाई उद्दार तथा पुनस्थापन गर्ने बाहेक कारितास नेपालले वातावरण, खाद्य सुरक्षा, आयमूलक सीपको तालिम तथा कृषि लगायतका विविध क्षेत्रमा काम गर्दै आएको बताइएको छ ।
कारितास नेपाल विशेषगरी दैवी तथा प्राकृतिक प्रकोपमा परी घरबार गुमाएकाहरुलाई पुनस्थापनमा केन्द्रीत रहँदै आएको छ । २०७२ सालको भूकम्पमा पनि नेपाल सरकार बाहेक सबैभन्दा ठूलो परिमाणमा भूकम्प पीडितलाई तुरुन्तै राहत दिनेमा कारितास नै रहेको बताइएको छ ।
