कनकाई खबर \ झापाको कनकाई माई आसपासको कनकाई सामुदायिक वन समूहको जगंलमा अलपत्र अवस्थामा भेटिएकी एक महिलाको उद्धार भएको छ ।
मेची महाकाली बुहारी संयुक्त आवाज संस्थाले अलपत्र परेकी महिलाको उद्धार गरेको हो । केहि दिनदेखि कनकाई माई कोटीहोममा देखिएकी महिला शरीरभरी चोट पटकले ग्रस्त अवस्थामा स्थानीयले भेटेका थिए । आफ्नो नाम सुमित्रा शाह वताउँने ती महिला कसरी यस ठाउँमा आईपुगिन् भन्ने विषयमा कसैलाई पनि थाहा नभएको बताइएको छ ।
मानसिक सन्तुलन गुमाए जस्तो देखिने ती महिला बोल्न सक्ने भएपनि कहिले तोपगाछि कहिले बरगाछि आफ्नो घर वताउँछिन । कनकाई माई वरपर असहायहरु बस्दै आएका देखिन्छन् । स्थानीयका अनुसार बाटोमा अलपत्र परेका असहायलाई प्रहरीले नै यो स्थानमा ल्याएर छोडिदिने गरेको वताइएको छ ।
कनकाई माईमा भक्तजनले सहयोग गरेको दानले नै यिनीहरुको पेट भरिएको पाईन्छ । कनकाईका समाजसेवी शेरबहादुर थापाले उनलाई ईटहरी लानु अघि कपडा, ब्ल्याङकेट तथा फलफूल वितरण गरेका थिए । स्थानीयको सुचना पाएर मेची महाकाली संयुक्त बुहारी आवाजका सदस्यहरु सोही ठाउँमा पुगेका थिए । एक दिनको लागी कोटीहोमको प्रणामी मन्दिरको आश्रममा राखेर संस्थाले प्रहरी तथा नगरपालिकामा बेसहारा महिलाको बारेमा अवगत गराउँदै सहयोग माग गरेका थिए ।
अलपत्र परेकी ती महिलालाई साधुसन्त बाट नै असुरक्षित महसुस गरी मेची महाकाली संयुक्त बुहारी आवाज संस्थाले उद्धार गर्ने निर्णय गरेको संस्थाकी झापा अध्यक्ष शिखा खड्का गणेशले बताएकी छन् ।
उनलाई नुहाउने र कपडा फेर्नको लागी बुहारी आवाज संस्थाका सदस्यले मद्दत गरेका छन। कनकाई नगरपालिका वडा नं ४ का वडअध्यक्ष रोशन सुवदीको पहलमा एम्वुलेन्स उपलब्ध भएको थियो । सिफारिस पत्र सहित ईटहरीको मानव उद्धार गर्ने संस्था माया घरमा उनलाई लगिएको बताइएको छ ।
