कनकाई खबर \ बिर्तामोडमा रहेको साहित्य चौतारीले आफ्नो स्थापना दिवसलाई संगीत वर्षको रुपमा मनाउने भएको छ ।
२३औं स्थापना दिवस तथा २०९औँ भानु जयन्तीको अवसर पारेर चौतारीले यस वर्षलाई संगीत वर्षका रुपमा मनाउँन लागेको बताइएको छ । यसै अवसरमा संस्थाले शास्त्रीय संगीतका विद्वान प्रशिक्षक कुशेश्वर राईलाई विशिष्ट संगीत सम्मान अर्पण गर्ने भएको छ ।
आफ्नो स्थापना दिवसको सन्दर्भमा संगीत वर्षको रुपमा मनाउने र संगीत साधकलाई विशिष्ट सम्मान गर्ने तय गरिएको पत्रकार सम्मेलन मार्फत जानकारी दिइएको हो ।
साहित्य चौतारी झापाको स्थापना २०५६ साल असार ३१ गते भएको हो । राष्ट्रकवि माधवप्रसाद घिमिरेले साहित्य चौतारी झापाको उद्घाटन गरिदिएका थिए ।
आगामी असार ३१ गते सिंहवाहिनी महिला समूहको नौमती बाजासहित साहित्यकारहरुको र्यालीले बिर्तामोड नगर परिक्रमा गर्ने र सभाहलमा संगीत साधक राईलाई सम्मान अर्पण गर्ने संरक्षक देवीभक्त श्रेष्ठले बताए ।
होटल हिकोला हेरिटेज साहित्य चौतारीको सभाहलमा लोक तथा लोकदोहोरी गायक इलामे श्रष्टा देवीप्रसाद गौतमको प्रमुख आतिथ्यमा हुने कार्यक्रममा गायन, नृत्य, कविता वाचनलगायतका साहित्यिक तथा साँगीतिक प्रस्तुति रहने संरक्षक श्रेष्ठले बताए ।
कार्यक्रम संयोजक तथा साहित्य चौतारी झापाका उपाध्यक्ष दिपक रायमाझीको अध्यक्षता तथा साहित्य चौतारी झापाका साहित्य तर्फका उपाध्यक्ष कृष्ण सुवेदी निराकारले स्वागत गरेका थिए । महासचिव खगेन्द्रा खुशीले सञ्चालन गरेको पत्रकार सम्मेलनमा सञ्चारकर्मीका जिज्ञासाको समाधान संस्थापक संरक्षक श्रेष्ठले गरेका थिए ।
