बिर्तामोड \ बिर्तामोड नगरपालिका अगाडि हुलहुज्जत गरेपछि पक्राउ परेका बिर्तामोड उद्योग वाणिज्य संघका अध्यक्ष प्रकाश शिवाकोटीसहित ११ जनालाई प्रहरीले छ घण्टापछि रिहा गरेको छ ।
बुधबारे हटियामा अनाधिकृत रुपमा बस्दै आएका व्यापारीलाई बिजुलीको मिटर माग गर्दै आन्दोलनरत उनीहरुलाई बिर्तामोड प्रहरीले आज दिउँसो नियन्त्रणमा लिएको थियो । डीएसपी रुगमबहादुर कुँवरका अनुसार पक्राउ परेकाहरुलाई वाणिज्य संघका पूर्व अध्यक्ष बलराम कार्की र कुमार भट्टराईको राेहवरमा रिहा गरिएको हाे ।
जिल्ला ट्राफिक प्रहरी कार्यालय बिर्तामोडमा भएको छलफलमा उनीहरुलाई शान्तिपूर्ण आन्दोलन गर्न आग्रह गरिएको एमाले झापाका अध्यक्ष दीपक कार्कीले जानकारी दिनुभयो । छलफलमा झापाका प्रमुख जिल्ला अधिकारी छविलाल रिजालले स्थानीय सरकार अधिकार सम्पन्न भएकाले सबै निर्णयको अधिकार नगरपालिकामा निहित भएको बताउनु भएको थियो । प्रजिअ रिजालले वार्ता र संवादको माध्यमबाट सहमति कायम गरी निष्कर्षमा पुग्नुपर्ने भएकाले सबै सरोकारवालाहरू उत्तिकै गम्भीर र जिम्मेवार बन्नुपर्नेमा जोड दिनुभयो ।
व्यापारी र नगरपालिकाबिच उत्पन्न समस्या समाधानका लागि बुधबार इलाका प्रहरी कार्यालय अनारमनीमा प्रमुख जिल्ला अधिकारी रिजालको उपस्थितिमा भएको छलफलले तीनदिन भित्र बिद्युत मिटर जडानको प्रबन्ध मिलाउने मौखिक समझदारी भएको बिर्तामोड उद्योग वाणिज्य संघले बिज्ञप्ति मार्फत जनाएको छ । छलफलमा नेकपा एमालेका जिल्ला अध्यक्ष दिपक कार्की, नेपाली कांग्रेसका झापा अध्यक्ष देउकुमार थेबे, नेपाल उद्योग वाणिज्य संघ प्रदेश १ को तर्फबाट अध्यक्ष टिकाराज ढकाल, बिर्तामोड उवा संघको तर्फबाट प्रकाश शिवाकोटी सहभागी थिए ।
