कनकाई खबर / कनकाईको सुरुङ्गामा शान्ती सुरक्षा कायम राख्ने कार्यमा जनताको भरोसा बनेको इलाका प्रहरी कार्यालय सुरुङ्गाको कमजोर सुरक्षा व्यवस्थाका कारण पछिल्लो समय स्थानीय स्तरमा चोरी,तस्करी र दुरव्यसनी बढेपछि सरोकारवालाहरुको ध्यानाकर्षण भएको छ ।
चोरी,तस्करी र दुरव्यसनीसँगै बजार क्षेत्रमा दिनदहाडै सहकारी बैँकमा लुटपाट हुन थालेपछि कनकाई उद्योग वाणिज्य संघले सरोकारवालाहरुसँग सुरक्षा अन्तक्रिया प्रारम्भ गरेको छ ।
वित्तिय संस्थासहित साना ठूला चोरीका घटना, लागुऔषत दुरव्यसनीसहितको गतिविधि बढ्न थालेपछि वाणिज्य संघले व्यपारी, व्यवसायी र सरोकारवालाहरु समक्ष सुरक्षा सम्बन्धि अन्तक्रिया थालेको हो । कनकाई उद्योग वाणिज्य संघका अध्यक्ष तुलसी विमलीको सभापतित्वमा सम्पन्न भएको अन्तक्रियामा कनकाई नगरपालिकाका प्रमुख राजेन्द्रकुमार पोखरेलले कनकाई क्षेत्रको वढ्दो सुरक्षा चुनौतीको समाधानकालागि आफुले सक्दो पहल गर्ने प्रतिवद्धता जनाए ।
कार्यक्रममा इलाका प्रहरी कार्यालय बिर्तामोडका प्रहरी प्रमुख रुवलबहादुर कुवँर, कनकाई नगरपालिका ३ का वडाअध्यक्ष युवराज चम्लगाईँ, उद्योग वाणिज्य महासंघ १ नं. प्रदेशका सदस्य कुमारमणि पोखरेल लगायतका साथमा यस क्षेत्रका राजनैतिक दलका प्रमुख तथा प्रतिनिधि एवम उद्योगी व्यापारी, बैँक तथा वित्तिय संस्थाका प्रमुख तथा प्रतिनिधिहरुको सहभागिता रहेको थियो ।
अन्तक्रियाबाट यस क्षेत्रमा रात्रीकालिन चौकीदार थप्ने, सिसिटिभी र हरेक पसल तथा व्यापार व्यवसाय गर्नेले अनिवार्य रुपमा पसल र घर अगाडि उज्यालो बत्ती वाल्ने लगायतका निर्णय भएको कनकाई उद्योग वाणिज्य संघका महासचिव सरोज सिटौलाले जानकारी दिए ।
