कनकाई खबर \ पतन्जली योग कनकाई नगर समितिले आठौं अन्तर्राष्ट्रिय योग दिवसलाई विशेष कार्यक्रमका विच सम्पन्न गरेको छ ।
कनकाई ८ स्थित लक्ष्मीनारायण योग साधना केन्द्रको सभा हलमा योगअभ्यास सहित सम्पन्न कार्यक्रमलाई सम्बोधन गर्दै कार्यक्रमका प्रमुख अतिथी कनकाई नगरपालिकाका प्रमुख राजेन्द्र पोखरेलले नियमित रुपमा हुने योगअभ्यासका कारण मानिसमा भएका तनाव, रिस रागको नियन्त्रण भई मानसिक र शारीरिक अवस्थालाई सन्तुलनमा राख्न सकिने बताए । हरेक दिन योगअभ्यास गर्ने या योगलाई स्मरण गर्दा मात्रै पनि तनाव कम हुने भन्दै जीवन शान्त, फलदायी र उत्पादनमूलक बनाउने कार्यमा योगको भूमिका महत्वपूर्ण हुने भएकाले नियमित योगअभ्यासमा सक्रिय रहन नगर प्रमुख पोखरेलले नगरवासीलाई आग्रह गरेका छन् ।
कनकाई नगरपालिका क्षेत्रका सबै वडामा रहेका हरेक टोल टोलमा योगअभ्यासलाई सक्रिय गराउँन नगर क्षेत्रका योग साधकहरुलाई नगर प्रमुख पोखरेलले अनुरोध गरे । नगर क्षेत्रका विद्यालयहरुमा समेत योगअभ्यास साथै भान्सा नै औषधालय हो—भन्ने शिक्षामुलक पाठ्यक्रम समावेश गर्ने योजना रहेको नगर प्रमुख पोखरेलले जानकारी दिए ।
पतन्जली योग कनकाई नगर समितिका अध्यक्ष टिकाप्रसाद जमरकट्टेलको सभापतित्व रहेको कार्यक्रममा योग समिति झापाका सहसचिव रुद्र ओलीले स्वागत सहित आठौं अन्तर्राष्ट्रिय योग दिवसको महत्वका विषयमा प्रकाश पारेका थिए ।
योग समिति कनकाईका महासचिव रामप्रसाद निरौलाले संचालन गरेको औपचारिक कार्यक्रममा सहभागी कनकाई ८ का वडाअध्यक्ष लिलावहादुर कटुवाल, वडासदस्य रीता उप्रेती, साधना केन्द्रका संरक्षक पदम श्रेष्ठ, साधन केन्द्रका संयोजक लक्ष्मीप्रसाद ढुङ्गाना लगायतले नियमित योग अभ्यासले शरीर र मस्तिष्कलाई चुस्त, स्फूर्त राखी मानसिक तथा शारीरिक विकारहरूबाट मुक्ति दिलाउन मद्दत गर्ने भन्दै योगअभ्यासलाई निरन्तरता दिनु पर्नेमा जोड दिए ।
