कनकाई खबर \ “पृथ्वीको संरक्षण ः दिगो प्रकृतिमैत्री जीवन यापन” भन्ने मूल नाराका साथ डिभिजन वन कार्यालय झापाले यहाँको धार्मिक तथा पर्यटकीय क्षेत्र कनकाई—२, स्थित सुकेडाँगी सामुदायिक वन क्षेत्रमा वृक्षारोपण गरेको छ ।
वातावरणको शुद्धताकालागि झापाका विभिन्न क्षेत्रमा वृक्षारोपण गर्दै आएको डिभिजन वन कार्यालयले विश्व वातावरण दिवसको अवसर पारेर सुकेडाँगी सामुदायिक वन समूहको समेत सहभागीतामा रुद्राक्षका २५ वटा विरुवा रोपण गरेको हो । वृक्षारोपणको शुभारम्भ गर्दै डिभिजनल वन अधिकृत युवराज मास्केले मानव जीवनको सृष्टि साथै मानिसको अस्तित्वसँगै जोडिएको पृथ्वीको संरक्षणकालागि वातावरणको शुद्धता अपरिहार्य रहेको बताएका छन् ।
वातावरणको शुद्धताकालागि वृक्षारोपण नै एक मात्र विकल्प रहेको भन्दै डिभिजनल वन अधिकृत मास्केले मानिसले आफ्नो जीवनका हरेक क्षणलाई अवसरको रुपमा लिएर पृथ्वीको संरक्षणकालागि वृक्षरोपण गर्न अनुरोध गरे ।
प्रकृतिले दिएका रुख बुट्टाहरुबाट हरेक किसिमका रोगको औषधिजन्य जडिबुटी बन्न सक्ने भएकाले डिभिजन वन कार्यालयको अगुवाईमा आफ्नो मातहतमा रहेका निकायहरुमा समेत विभिन्न प्रजातीका वोटविरुवा रोपण गर्ने कार्यलाई निरन्तरता दिँदै आएको अधिकृत मास्केले जानकारी दिए ।
धार्मिक तथा पर्यटकीय क्षेत्रहरुमा वातावरणको शुद्धतालाई विशेष ध्यान दिनु पर्ने तर्फ जोड दिँदै डिभिजनल वन अधिकृत मास्केले सुकेडाँगी सामुदायिक वन समूहलाई दुई थान डस्वीन समेत वितरण गरे । डिभिजन वन कार्यालय झापाले प्रदान गरेको डस्विन सुकेडाँगी सामुदायिक वन समूहका तर्फबाट अध्यक्ष शान्ती उपाध्याय र सचिव गोमा निरौलाले ग्रहण गरेका थिए ।
वृक्षारोपण कार्यक्रममा सहायक वन अधिकृतद्वय ओमनाथ भट्टराई र राजकुमार खत्री, कनकाई सब डिभिजन कार्यालय सुरुङ्गाका प्रमुख राजु खड्का लगायत अन्य कर्मचारीसहित सुकेडाँगी सामुदायिक वन समूहका पदाधिकारी तथा सदस्यहरुको समेत उल्लेख्य सहभागिता रहेको बताइएको छ ।
