कनकाई खबर / झापाको कनकाई नगरपालिकामा सुशासन, गरिवी विरुद्धको अभियान, पारदर्शिता साथै प्रजातान्त्रीक प्रक्रियालाई संस्थागत गर्ने विषयमा अबको प्राथमिक्ता रहने बताइएको छ ।
गणतन्त्र दिवसको समेत अवसर पारेर कनकाई नगरपालिकाको कार्यपालिका बैठकले गरिवी विरुद्धको अभियान, सुशासन र पारदर्शिता अब कनकाईको प्राथमिक्तामा रहने निर्णय भएको बताइएको छ ।
आगामी आर्थिक वर्षमा कनकाईमा बिपन्न बर्ग र समुदायकालागि बस्न नहुने घर जेजती छन् त्यसलाई अब संख्यामा होइन, बस्न नहुने कनकाईका सबै घरहरुलाई यो पाँच वर्ष भित्रमा पुनःनिर्माण गरी सुरक्षित बसोबासको व्यवस्था मिलाउँने कनकाई नगरपालिकाका प्रमुख राजेन्द्र पोखरेलले प्रतिवद्धता जनाएका छन् ।
कनकाई नगरपालिका भित्र सिंचाई सुविधाको अतिआवश्यक्तालाई हेरेर आवश्यक्ता र अवस्थालाई मध्यनजर गर्दै बोरिङ गर्ने कृषककालागि यो दुई वर्षभित्रमा नगरवासी सबै कृषकलाई मोटर वितरण गरी सक्ने नगर प्रमुख पोखरेलले बताए ।
कनकाईका सबै वडाअध्यक्षसहित जनप्रतिनिधिहरुलाई विशेष होसियारीका साथ कार्य सम्पादन गर्न निर्देशन गर्दै नगर प्रमुख पोखरेलले कनकाईलाई भ्रष्टचार मुक्त नगर निर्माणकालागि पारदर्शिता कायम राख्नु पर्नेमा जोड दिए ।
कनकाईमा पुर्वाधार, कृषि, शिक्षा, पर्यटनको क्षेत्रमा काम भइरहेको साथै स्वास्थ्यका क्षेत्रमा १५ दिन भित्रमा केही परिवर्तन आउँने गरिको व्यवस्थापन गर्ने प्रतिवद्धता जनाइएको छ । बेरोजगार युवाहरुलाई स्वरोजगार बनाउँनकालागि समेत कनकाईले थप कार्यक्रम अघि बढाउँने बताइएको छ ।
हाम्रो कनकाई राम्रो कनकाईसँगै उत्कृष्ट कनकाई नगरी निर्माणकालागि गणतन्त्र दिवसकै अवसरमा कनकाईका जनप्रतिनिधिहरुको तर्फबाट नगर प्रमुख पोखरेलले प्रतिवद्धता जनाएका छन् ।
सरकारले ल्याएको भूमी व्यवस्थापन कार्यक्रम अनुसार कनकाई नगरका सबै वडाको टोल टोलमा रहेका ऐलानी जग्गा छुट्याउने काम सकिएको हुँदा आगामी तीन महिना भित्र भोगचलन गरिरहेका नागरिकहरुलाई धनीपुर्जा उपलब्ध गराउन भूमी आयोग समक्ष पत्राचार गर्ने निर्णय भएको कनकाई नगरपालिकाकी उपप्रमुख आशा शर्मा शिवाकोटीले बताएकी छन् । उपप्रमुख शिवाकोटीले गणतन्त्र दिवस नेपालको हकमा एउटा ऐतिहासिक दिन भएकाले यसै अवसरमा नवनिर्वाचित जनप्रतिनिधिहरुले सुशासन कायम गरेर अघि बढ्ने प्रण गर्नु पर्ने बताएकी छन् ।
कनकाई नगरपालिकाका प्रमुख प्रशासकीय अधिकृत मोहनप्रसाद न्यौपानेबाट संचालन भएको गणतन्त्र दिवसको औपचारिक कार्यक्रमको अवसरमा कनकाई ६ का वडाअध्यक्ष दीर्घवहादुर थापा, कनकाई ८ की वडासदस्य रीता उप्रेती, राप्रपाका क्षेत्रीय अध्यक्ष नारायण पोखरेल, सुरुङ्गा जेसीजकी अध्यक्ष सुस्मा न्यौपाने उप्रेती लगायतले मुलुकमा गणतन्त्र प्राप्तीपछि सरकारका प्रतिनिधिहरुले जनताको आशा र भरोसा बन्नु पर्ने तर्फ जोड दिए ।
