झापा गाउँपालिका \ झापाको झापा गाउँपालिकामा नवनिर्वाचित जनप्रतिनिधिलाई प्रमाण पत्र वितरण साथै सपथ ग्रहण गराइएको छ ।
गाउँपालिकाको कार्यालयमा आयोजना गरीएको कार्यक्रममा निर्वाचन अधिकृत मानबहादुर घिमिरेले नवनिर्वाचित जनप्रतिनिधि सबैलाई विजेताको प्रमाण पत्र प्रदान गरेका थिए । त्यस्तै नवनिर्वाचित अध्यक्ष जयनारायण साहले उपाध्यक्ष अन्जुदेवी थपलिया सहित नवनिर्वाचित ३६ जना जनप्रतिनिधिहरुलाई पद तथा गोपनीयताको सपथ गराएका छन् । यसअघि अध्यक्ष साहले झापा जिल्ला अदालतका न्यायाधीश तथा मुख्य निर्वाचन अधिकृत गिरीराज गौतमबाट पद तथा गोपनियताको सपथ लिएका थिए।
निर्वाचन अधिकृत मानबहादुर घिमिरेको अध्यक्षता र नवनिर्वाचित अध्यक्ष जयनारायण साहको प्रमुख आतिथ्यमा सम्पन्न कार्यक्रममा नेपाली कांग्रेसका झापा जिल्ला सभापती देउकुमार थेवे, नेकपा एमाले झापा गाउँपालिका अध्यक्ष गजेन्द्र ताम्ली, लोकतान्त्रिक समाजवादी पार्टीका झापा गाउँपालिका अध्यक्ष प्रभु यादव , नेपाल शिक्षक महासंघ झापा गाउँपालिका अध्यक्ष जगन्नाथ राजबंशी , समाजसेवी एवम् नेपाली कांग्रेसका युवा नेता शिवकुमार कडेल लगायतले शुभकामना मन्तव्य राखेका थिए । कार्यक्रममा प्रमुख प्रशासकीय अधिकृत खेमराज थापाले स्वागत तथा शिक्षा शाखा प्रमुख जिवनप्रसाद ढकालले सञ्चालन गरेका थिए । नवनिर्वाचित जनप्रतिनिधिहरुले सपथ ग्रहणपछि पदभार ग्रहण गरेका छन् ।
