शिवसताक्षी / शिवसताक्षीका नव निर्वाचित जनप्रतिनिधीलाई प्रमाण पत्र वितरण गरिएको छ ।
निर्वाचन कार्यालयले एक कार्यक्रम गरी नव निर्वाचित जनप्रतिनिधिहरुलाई प्रमाण पत्र प्रदान गरेको हो । कार्यक्रममा निर्वाचन अधिकृत मधु पोख्रेलले शिवसताक्षीका ५७ जना जनप्रतिनिधिहरुलाई प्रमाण पत्र प्रदान गरेका थिए ।
प्रमाण पत्र वितरणका क्रममा बोल्दै अधिकृत पोख्रेलले निर्वाचन सफल बनाउन सहयोग गर्ने राजनीतिक दल, कर्मचारी, शिवसताक्षी नगरपालिका, सुरक्षा निकायलगायतलाई धन्यवाद दिए । उनले सबै जनप्रतिनिधीहरुलाई बधाई तथा शुभकामना व्यक्त गरे ।
कार्यक्रममा बोल्दै नवनिर्वाचित शिवसताक्षी नगरप्रमुख मेघहाङ्ग थोप्रा (रोशन)ले जनप्रतिनिधीले नगरबासीको जन भावना अनुरुप काम गर्नु पर्ने बताए । उनले भने, हामीलाई जनताले चुनेर पठाएकाले हामी अब निश्पक्षीय ढङ्गले शिवसताक्षीको विकासमा लाग्नु पर्छ ।
वडाध्यक्षहरुको तर्फबाट नवनिर्वाचित शिवसताक्षी नगरपालिका वडा नं. २ का वडाध्यक्ष भिम नेम्वाङ्ग, शिवसताक्षी ८ का अध्यक्ष सन्त फेवदिनले बोलेका थिए ।
कार्यक्रममा शिवसताक्षी नगरपालिका प्रमुख प्रशासकीय अधिकृत प्रकाश चौधरी, लेखा अधिकृत प्रकाश योङ्गया, प्रशासन प्रमुख डिल्ली नेपाल लगायतको उपस्थिति रहेको थियो । कार्यक्रम सञ्चालन शिवसताक्षी नगरपालिकाका सहकारी प्रमुख तथा निर्वाचन कार्यलयका कर्मचारी बद्री दाहालले गरेका थिए ।
