कनकाई खबर \ झापाको कनकाईमा स्थानीय तह निर्वाचनको अन्तिम मत परिणाम केही समयपछि नै सार्वजनिक हुँदैछ ।
कनकाई नगरपालिकाको आगामी पाँच वर्षे कार्यकालकालागि नगरप्रमुखको रुपमा नेकपा एमालेका तर्फबाट पुनः राजेन्द्र पोखरेल र उपप्रमुखका रुपमा नेपाली कांग्रेसका तर्फबाट आशा शर्मा शिवाकोटी निर्वाचित हुने पक्का पक्की जस्तै भएको छ ।
यस अघि कनकाई नगरपालिकाको प्रमुखको रुपमा राजेन्द्र पोखरेल र उपप्रमुखका रुपमा मन्जु प्रसाईको नेतृत्वमा रहेको कनकाई नगरपालिका विभिन्न क्षेत्रबाट नेपालकै पहिलो, प्रदेश नं.१ को पहिलो हुँदै आएको भएपनि अब यो स्थानीय तहको निर्वाचन शान्तीपूर्ण रुपमा सम्पन्न भएसँगै छिटोछरीतो मत गणना सम्पन्न गर्ने झापाको पहिलो नगरपालिका हुने भएको छ ।
झापाका १५ वटा पालिकाहरु मध्ये सबैभन्दा पहिला कनकाई नगरपालिकाको मत गणनाको अन्तिम परिणाम सार्वजनिक हुन लागेको हो । अन्य पालिकाहरुको तुलनामा सवैभन्दा पहिला मत गणना सम्पन्न हुने कनकाई नगरपालिका झापाकै पहिलो नगरपालिका हुने निश्चित भएको छ । मत गणनाको प्रारम्भिक चरणबाटै कुनै किसिमको जटिल समस्या नआइकन गणना सम्पन्न हुन लागेको कनकाईमा कुनै किसिमको विवाद नआएमा आज रातीको ११ बजे सम्ममा अन्तिम मत परिणाम सार्वजनिक गर्न सकिने कनकाई स्थित निर्वाचन आयुक्त दिपक कोइरालाले जानकारी दिएका छन् ।
