कनकाई खबर \ नेकपा एमाले कनकाईले पार्टी हित विपरित गतिविधि गरेको भन्दै स्थानीय दुईजना नेतालाई कार्वाही गरेको छ ।
एमाले कनकाई नगर कमिटीको आज शुक्रवार बसेको बैठकको निर्णयअनुसार नगर कमिटी सदस्यद्वय श्यामसुन्दर ओली र परशुराम गिरीलाई पार्टीको साधारण सदस्य समेत नरहने गरी निष्कासन गरेको जनाइएको छ । नेकपा एमाले कनकाई नगर कमिटीले अध्यक्ष खड्गप्रसाद प्रसाईँद्वारा हस्ताक्षर गरीएको एक प्रेस विज्ञप्ती जारी गर्दै उनीहरुलाई कार्वाही गरेको जनाएको हो । एमालेबाट नगर प्रमुखको आकांक्षी बनेका ओलीले पार्टीको टिकट नपाएपछि तत्काल राप्रपामा प्रवेश गरी नगरप्रमुखको प्रत्यासी बनेसँगै एमाले नगर कमिटीले पार्टीको विधान अनुसार कार्वाही गरेको जनाएको छ ।
त्यस्तै एमाले झापा जिल्ला कमिटीको मिति२०७९ वैशाख १७ गतेको च.नं.३२७ को पत्रअनुसार कनकाईको वडा नं. २ निवासी एमाले नगर कमिटीका सदस्य समेत रहेका परशुराम गिरीलाई पार्टीको साधारण सदस्य समेत नरहने गरी कार्वाही गरिएको जनाइएको छ । पार्टीले खडा गरेको कनकाई २ को वडाअध्यक्षको आधिकारीक उम्मेद्वारको विरुद्धमा बागी उम्मेद्वारी दर्ता गरेर पार्टी विरुद्ध गतिविधि गरेको भन्दै पार्टीको विधान अनुसार गिरीलाई कार्वाही गरेको विज्ञप्तीमा जनाइएको छ ।
