कनकाई खबर \ झापाको कनकाईमा कारीतास नेपालले आयोजना गरेको वित्तिय साक्षरता तालिमबाट १५० स्थानीय युवा लाभान्वीत भएका छन् ।
सुरुङ्गास्थित होटल क्विन प्यालेसमा सोमबारदेखि संचालन भएको पाँच दिवसीय तालिमको नाम अनुसारकै प्रसिद्धि कमाएका प्रशिक्षक लोकप्रिय खनालले सहजीकरण गरिरहेका छन् । कारीतास नेपाल क्षेत्रीय कार्यालय दमकका प्रमुख देवेन्द्र पोखरेलको सभापतित्वमा संचालन भएको तालिमको कनकाई नगरपालिकाका प्रमुख राजेन्द्र पोखरेलले उद्घाटन गरेका हुन् । कार्यक्रमलाई सम्बोधन गर्दै नगर प्रमुख पोखरेलले हरेक युवाहरुले अब सिप सिकेर स्वावलम्बी बन्नु पर्नेमा जोड दिए । आफ्नो हातमा कुनै पनि कुराको सिप भएमा कसैको पनि बाटो हेर्नु नपर्ने भन्दै नगर प्रमुख पोखरेलले कारीतासले संचालन गरेका सिपमुलक तालिमबाट भरपुर फाइदा लिन सहभागीहरुलाई अनुरोध गरेका छन् ।
कारितास जापानको आर्थिक सहयोग तथा कनकाई नगरपालिकासँगको समन्वयमा कारितास नेपालद्वारा कनकाईको वडा नं ३, ४ र ८ मा बिगत एक बर्षदेखि “सुरक्षित बैदेशिक रोजगारको सुनिश्चितता तथा आप्रवासीहरुको दिगो स्थानिय पुर्नस्थापना प्रवर्धन” नामक परियोजना सञ्चालन गर्दै आएकोछ । बैदेशिक रोजगारलाई सुरक्षित, व्यवस्थीत र मर्यादित बनाउने तथा फिर्ती आप्रबासीहरुलाई स्वदेशमै पुर्नस्थापना प्रवद्र्धन गर्न सहयोग गर्ने प्रमुख उद्येश्यका साथ सञ्चालित परियोजनाले यस क्षेत्रमा आफ्ना विभिन्न कार्यक्रमहरु सञ्चालन गरिरहेको छ ।
यसै अवसरमा मानिसको दैनिक जिवनमा अति नै आवश्यक पर्ने वित्तिय साक्षरता सम्बन्धि पाँचदिवसीय तालिम सुरुङ्गामा संचालन भएको संस्थाका वरिष्ट सामाजिक परिचालक विवेक शिवाकोटीले जानकारी दिएका छन् । तालिमबाट जीवनमा सबैभन्दा ठूलो महत्व के रहेछ, आफ्नो जीवनस्तर कसरी उकास्ने भन्ने विषयमा ज्ञान प्राप्त भएको सहभागीहरुले बताए । त्यस्तै तालिममा सहभागी मीना खवास, सन्तोष चुडाल, मीना पाठक सिटौला लगायतले तालिमबाट आम्दानी र खर्चको सन्तुलन मिलाउँने तरिका साथै बचत गर्ने सिपको बारेमा नयाँ ज्ञान प्राप्त भएको बताए । कारीतास नेपालबाट अघिल्लो वर्ष मात्र प्राप्त तालिमका कारण आँफू आफ्नै गाउँघरमा उद्यमशिल बन्न थालिसकेको बताउँदै तालिममा सहभागी स्थानीय ४३ वर्षिय देवनारायण खड्काले कारीतासको हरेक तालिम व्यवहारीक भएको अनुभव सुनाए । वैदेशिक रोजगारीका सिलसिलामा साउदी अरबमा १० वर्ष विताएका खड्का हाल ६ वर्षदेखि सुरुङ्गास्थित आफ्नै भूमिमा दैनिक जीवन गुजार्दैछन् । उनले एक वर्षअघि कारीतासबाट प्राप्त तालिमको हाल सदुपयोग गरिरहेको बताए ।
परियोजनाका अधिकृत हिमालय अधिकारीले स्वागत सहित औचित्यमाथि प्रकाश पारेको तालिम कार्यक्रमको उद्घाटन समारोहको संचालन वरिष्ट सामाजिक परिचालक विवेक शिवाकोटीले गरेका थिए ।
