कनकाई खबर \ पुर्व मन्त्री एवम् नेकपा एमाले झापाका इञ्चार्ज अग्नी खरेलले आसन्न स्थानीय तहको निर्वाचनलाई लक्षीत गर्दै एमालेले अब न्यायप्रेमी जनतासँग गठबन्धन गरेर निर्वाचन हाँक्ने तयारीमा रहेको बताए ।
झापाको कनकाईमा नेकपा एमाले नगर कमिटीको निर्वाचन अभियान परिचालन समितिले आयोजना गरेको अभिमुखीकरण कार्यक्रमलाई सम्बोधन गर्दै नेकपा एमालेका नेता एवम् पुर्व मन्त्री खरेलले विकास र समृद्धिको सम्बाहकका रुपमा रहेको एमालेका विरुद्धमा केही राजनीतिक दलहरुले गठबन्धनको नाटक गरेर जनतालाई झुक्याउँने काम गर्न थालेको बताएका छन् । आँफैमा विचार नमिल्ने शक्ति नेपाली कांग्रेस र माओवादीले अहिले लाच पचाएर गठबन्धनको नाममा जनतालाई झुक्याउँने काम गर्न थालेकाले न्यायप्रेमी जनतालाई सचेत हुन नेता खरेलले अनुरोध गरेका छन् ।
निर्वाचन अभियान परिचालन समिति कनकाईका संयोजक रविन्द्र लम्सालको सभापतित्वमा सम्पन्न एमालेको अभिमुखीकरण कार्यक्रममा संविधान सभा सदस्य एवम् पार्टीका जिल्ला उपाध्यक्ष प्रेम गिरीले गठबन्धनकारी दलहरु अब आफ्नो पार्टीको चुनाव चिन्ह बिर्सिएर अर्को पार्टीको प्रचारमा लाग्नु आफैमा कमजोर देखिएको बताए । आसन्न स्थानीय निर्वाचनको संघारमा एमालेलाई कमजोर बनाउँन पाँच दलिय गठबन्धनले कनकाई नगरपालिकालाई लगाएको आरोप निराधार भएको बताउँदै नेता गिरीले गठबन्धनसँग अब एमाले झापाले मुकाबिल्ला गर्ने प्रष्ट पारे । भ्रष्टचारमुक्त जनप्रतिनिधिहरुले नेतृत्व गरेको कनकाई नगरपालिका हरेक हिसाबले नेपालकै पहिलो स्थानमा रहेको बताउँदै नेता गिरीले आसन्न निर्वाचनमा एमालेसँग त्रसित बन्दै आएका दलहरुले कोरीया काण्डलाई मसला बनाएर जनताको आँखामा छारो हाल्न खोजेको प्रतिक्रिया दिए । कोरीया पुगेका कनकाईका युवा के कारणले स्वदेश फर्किनु परेको हो भन्ने विषयलाई प्रचारमा ल्याएर सम्बन्धित युवाको व्यक्तिगत चरित्रको हत्या गर्न गठबन्धनका दललाई कसले अधिकार दियो ? नेता गिरीले प्रति प्रश्न गरे ।
कार्यक्रममा कनकाई नगरपालिकाका प्रवक्ता गोविन्द पौडेलले नगरपालिकाको पाँच वर्षे विकास गतिविधि सार्वजनिक गरेका थिए । प्रदेश सभा सदस्य एवम् एमाले क्षेत्र नं.४ झापाका इञ्चार्ज हिरा थापाले पाँच दलको गठबन्धनदेखि सचेत हुनु पर्ने बताउँदै यसले एमालेलाई समेत फाटो ल्याउँने षडयन्त्र गरिरहेको बताए । शेरबहादुर देउवाको दौराको फेरो समातेर बैशाखीको भरमा हिडेको गठबन्धनका कारण एमाले झन शक्तिशाली बन्दै गएको नेता थापाले प्रष्ट पारे ।
कनकाई नगर प्रमुख राजेन्द्र पोखरेलले पाँच वर्षमा भएका प्रगति साथै दिर्घकालिन रुपमा आयआर्जन गर्ने योजना निर्माणमा कनकाई नगरपालिका अघि बढिरहेको बताए । एमाले जिल्ला सदस्य ओम पाठकले स्वागत गरेको कार्यक्रममा पार्टीका स्थानीयदेखी माथिल्लो निकायका नेता तथा कार्यकर्ताको बाक्लो उपस्थिती रहेको एमाले कनकाई नगर कमिटी अध्यक्ष खड्ग प्रसाईँले जानकारी दिए । कार्यक्रमको संचालन उपाध्यक्ष विनोद रानाले गरेका थिए ।
