कनकाई खबर / कनकाई ४ स्थित शान्ति टोलमा पेवर्स प्रयोग गरी निर्माण कार्य सम्पन्न भएको शान्ति मार्गको एक विशेष समारोहका विच उद्घाटन गरिएको छ ।
हाम्रा स्थानीय सम्बाददाता सिएम शर्माले दिएको जानकारी अनुसार कनकाई नगरपालिकाका प्रमुख राजेन्द्र पोखरेल साथै कनकाईको वडा नं. ३ र वडा नं.४ का वडाअध्यक्षद्वय रुद्रप्रसाद चिमरीया एवम् गोविन्द पौडेलले संयुक्त रुपमा रिवन काटेर सडकको उद्घाटन गरेका हुन् ।
कनकाईको वडा नं. ३ र ४, स्थानीय उपभोक्ता साथै नगरपालिकाको साझेदारीमा कनकाई ४ शान्तिटोलको पश्चिम तर्फ साथै लक्ष्मी मार्गबाट पुर्व तर्फ कनकाई ३ को योगमाया मार्ग सम्म जोड्ने २० फिट चौडा भएको ३ सय १ मिटर पेवर्स सडक निर्माण सम्पन्न भएको हो । वडा नं.४ को क्षेत्रमा २ सय २६ मिटर र वडा नं. ३ को क्षेत्रमा ७५ मिटर सडक पेवर्स भएको बताइएको छ ।
शान्ति टोल १ नम्बर मार्ग निर्माण समितिले झण्डै ३२ लाखको लागतमा संपन्न गरेको मार्ग निर्माणकालागि स्थानीय उपभोक्ताबाट ७ लाख ६६ हजार ८ सय , नगरपालिकाबाट ५ लाख ७० हजार , कनकाई ३ बाट २ लाख ५० हजार र कनकाई ४ बाट १५ लाख ५० हजार प्राप्त भएको बताइएको छ । उक्त मार्ग स्थानीय युवाहरुबाट संचालित एबीसी कंक्रिट एण्ड कन्ट्रक्सन प्रालिको सल्लाह र सहयोगमा उपभोक्ता समितिले निर्माण गरेकोे हो ।
सडक उद्घाटन पछि सम्बोधन गर्दै नगर प्रमुख पोखरेलले शान्ति टोलले गरेको कामको प्रशंसा गरे । शान्ति टोलको १ नम्बर मार्गमा भएको निर्माण कार्य पेवर्सबाट बनेका नगर क्षेत्रका अन्य मार्ग भन्दा फराकिलो , लामो साथै उत्कृष्ट भएको र नगरकै नमुना सडक भएको भन्दै टोल भित्रका अरु सडकको निर्माण कार्यमा हौसला प्रदान गरेको हुनुपर्ने नगर प्रमुख पोखरेलले बताए ।
त्यसैगरी वडा नम्बर ३ का वडा अध्यक्ष रुद्रप्रसाद चिमरियाले शान्ति टोलकै सक्रियताले यस टोलसंग जोडिएको ७५ मिटर सडक वडा नं.३ मा पनि निर्माण भएको बताए । त्यस्तै वडा नम्बर ४ का अध्यक्ष गोविन्द पौडेलले वडा नं.४ मा सबै सडक कच्ची भएको अवस्थामा यो ५ बर्षको अवधिमा सडकको स्तरोन्नति तर्फ लाग्नु परेको जानकारी गराउदै यस्तो अवस्थामा शान्ती मार्ग नमुना मार्ग बनेको र अब अरु मार्ग पनि यसरी नै निर्माण गर्दै अघि बढ्नु पर्नेमा जोड दिए ।
शान्तिटोल विकास संस्थाले सडक उद्घाटनसँगै अन्तरक्रिया कार्यक्रम समेतको आयोजना गरेको थियो । शान्ति मार्ग १ निर्माण समितिका संयोजक पुर्णबहादुर बरालको अध्यक्षतामा सम्पन्न सडक उद्घाटन सहितको अन्तरक्रिया कार्यक्रममा टोल विकास संस्थाका संयोजक शिक्षासेवी दुर्गाप्रसाद चापागाईंले भावीयोजना सहितको प्रगति प्रतिवेदन प्रस्तुत गरेका थिए । त्यस्तै शिक्षक बुद्धिजीवी खड्गप्रसाद बिमली , स्थानीय उपभोक्ता पुर्ण पोखरेल , पत्रकार चुडामणि तिम्सिना लगायते कृषि मल , तालिम र सहभागीता , इन्डक्सन चुल्हो जस्ता विषयमा जिज्ञासा राखेका थिए । कार्यक्रममा उठेका सवालको नगर प्रमुख पोखरेलले जवाफ दिएका थिए ।
शान्ति टोल विकास संस्थाका उपाध्यक्ष भवानी निरौलाले स्वागत तथा निर्माण समितिका सचिव गुरुप्रसाद गौतमले संचालन गरेको कार्यक्रममा कनकाई वडा नं. ३ र ४ का जनप्रतिनिधिहरु छवि थपलिया , युवराज चौलागाईं , रोशन सुवेदी , गीता कडेल दर्जी , शिक्षा सेवी बुद्धिजीवी डा.पुण्यप्रसाद पौडेल , खड्गप्रसाद बिमली, युवा व्यवसायी दिपक चापागाईं, समाजसेवी तारकुमार कार्की , गोविन्द चापागाईं , जेष्ठ नागरिक सुदर्शन निरौला, एबीसी कंक्रिट एण्ड कन्ट्रक्सन प्रालिका सन्चालकहरु टिकाराम अधिकारी , गोकुल उप्रेती , निलकृष्ण उप्रेती लगायत स्थानीय उपभोक्ताको बाक्लो उपस्थित रहेको थियोे ।
