कनकाई खबर / कनकाई छठ सेवा समाजले सबै जातजातीको मिलन गराउँने साझा पर्वका रुपमा होली मिलन कार्यक्रमलाई वृहत रुपमा मनाएको छ ।
नकाई छठ सेवा समाजका अध्यक्ष राजकिशोर चौधरीको सभापतित्व एवम् संघिय सांसद एलपीसाँवा लिम्बूको प्रमुख आतिथ्य रहेको कार्यक्रम कनकाई ३ स्थित सुरुङ्गा जेसिजको सभा हलमा सम्पन्न भएको हो । कार्यक्रमलाई सम्बोधन गर्दै संघिय सांसद एलपीसाँवा लिम्बू,कनकाई नगरपालिकाका प्रमुख राजेन्द्रकुमार पोखरेल लगायतले सँस्कृतिको संरक्षणमा होली पर्वले महत्वपुर्ण भुमिका खेलेको बताए ।
सामाजिक एकता एवम् सद्भाव कायम गर्ने कार्यमा होली मिलन समारोहको आयोजना गरेर छठ समाजले विविधतामा एकताको सन्देश दिन खोजेको भन्दै रंगीन पर्वका रुपमा मनाइने होली पर्वले सामाजिक एकता कायम गर्न सहयोग पुग्ने विश्वास व्यक्त गरिएको छ ।
कार्यक्रम संयोजक छठ समाजका सचिव किरण कारकले स्वागत गरेको कार्यक्रमको संस्थाका वरिष्ठ उपाध्यक्ष खगेन्द्र महत्तोले औचित्यमाथि प्रकाश पारेका थिए । सोही कार्यक्रमका विच छठ सेवा समाजका जग्गादाता ईश्वर अग्रवाललाई समेत सम्मान गरिएको थियो ।
छठ सेवा समाजका महासचिव रविन्द्र गुप्ताको संचालनमा सम्पन्न भएको कार्यक्रममा कनकाई ३का वडाअध्यक्ष रुद्रप्रसाद चिमरिया, एमाले कनकाईका अध्यक्ष खड्ग प्रसाई , शिक्षासेवी चम्पा खनाल सुवेदी, कनकाई सामुदायिक वन समूहका अध्यक्ष खेम ओली लगायतले शुभकामना मन्तव्य राखेका थिए । सोहि कार्यक्रममा विविध साँस्कृतिक प्रस्तुतीहरु समेत राखिएको थियो । हरेक वर्ष कनकाई छठ सेवा समाजले स्थानीय स्तरमा रहेका क्रियाशिल संघसंस्था, समाजसेवी व्यक्तित्वहरुसँग होली मिलन विशेष कार्यक्रमको आयोजना गर्दै आएको समाजका पुर्व अध्यक्ष चन्दन शाहले जानकारी दिए ।
