कनकाई खबर \ झापाको कनकाई नगरपालिकाले किसानको पशुधन संरक्षणकालागि नगरका सबै वडामा पशु विमा कार्यक्रम संचालन गरेको छ ।
पशु विमालाई थप व्यवस्थित बनाउँन विमा कम्पनीसँग गरेको सम्झौता अनुसार नगरपालिकाले कामलाई तिव्रता दिन थालेको हो । कृषि तथा पशुपालनका क्षेत्रलाई प्राथमिक्ताका साथ अघि बढाउँदै आएको कनकाई नगरपालिकाले यस आ.व.मा २० हजार पशु चौपायको विमा गर्ने लक्ष्य राखेको बताइएको छ ।
कनकाई नगरपालिका र हेफर प्रोजेक्ट नेपालको साझेदारी तथा अभियान नेपालको सहजीकरणमा संचालित साझेदारीमा कृषि तथा पशुपालन उद्यमशिलता विकास परियोजना अन्तर्गतको पशु विमा कार्यक्रमकालागि यस अघि नै हिमालयन इन्सोरेन्स कम्पनीसँग सम्झौता पत्रमा हस्ताक्षर भए अनुसार विमा कार्यक्रम संचालन भएको हो । कनकाईको वडा नं.७ बाट पशु विमा कार्यक्रमको उद्घाटन गर्दै कनकाई नगरपालिकाका प्रमुख राजेन्द्र पोखरेलले विमा कार्यक्रमबाट वास्तविक कृषकहरु प्रत्यक्ष रुपमा लाभान्वित हुने विश्वास लिएको बताए ।कृषि तथा पशुपालनलाई नै मुख्य व्यवसाय बनाउँदै आएका कनकाई नगर क्षेत्रका कृषकहरुलाई लक्षित गरी नगरपालिकाले हेफर प्रोजेक्ट नेपाल र अभियान नेपालसँगको साझेदारीमा पाँच करोडको कार्यक्रम संचालनमा ल्याएको कनकाई नगर प्रमुख पोखरेल बताउँछन् ।
पशुधनको विकास अनि संरक्षणकालागि यस अघि पनि कनकाई नगर क्षेत्रमा सप्ताह व्यापी पशुस्वास्थ्य शिविर संचालन भइसकेको बताइएको छ । यसै गरी पशु स्वास्थ्य विमाको कार्यक्रमलाई पनि अभियानका रुपमा अघि बढाइने लक्ष्य रहेको नगर प्रमुख पोखरेल बताउँछन् । आफ्नै भूमिमा केही गर्न चाहने नगरवासीले अब विदेशिनु नपर्ने व्यवस्थाकालागि कनकाई नगरपालिकाले नगर समृद्धिका थप योजना अघि सारेको नगर प्रमुख पोखरेलले जानकारी दिए ।
कनकाईको पशु विमा कार्यक्रमकालागि संघीय सरकारबाट ८० प्रतिशत प्रिमियम अनुदानमा उपलव्ध हुने छ भने कनकाई नगरपालिकाबाट थप एक लाख रुपैंयाँ बराबरको प्रिमियम अनुदानमा व्यवस्थापन गरीएको परियोजनाका प्राविधिक संयोजक जीवन सुवेदीले जानकारी दिए । यस आधारमा एउटा पशु चौपायको एक लाख बराबरको बिमा गर्दा कृषकले ६ सय ५० रुपैंया मात्र बुझाउँनु पर्ने गरी व्यवस्था भएको प्राविधिक सुवेदी बताउँछन् ।
