कनकाई खबर / झापाको कनकाई ४ स्थित पुकार अपाङ्ग अशक्त समाजमा रहेका १३ जना असक्त वालवालिकालाई उनीहरुले ईच्छा गरेअनुसारको भोजन गराइएको छ ।
दाताहरुकै सहयोगबाट संचालित आश्रममा हाल अमेरीका बस्दै आएको एक पारिवारीक समूहको अगुवाईमा वालवालिकाहरुले ईच्छा गरेअनुसारकै खानेकुरा खुवाइएको हो । दाताहरुले वालवालिकासँगै बसेर उनीहरुको ईच्छाअनुसार खाजाका रुपमा मःम साथै खाना खुवाइएको दाता जनक पौडेलले बताउँनुभयो ।
दाता पौडेलले आफ्ना दिवङ्गत भइसकेका पिताको पुण्य तिथीको अवसर पारेर वालआश्रममा आई उनीहरुको ईच्छा भोजन गराएको बताउँनुभएको छ । भोजनका साथै वालवालिकाको व्यवस्थापनमा अतिआवश्यक अन्य सामाग्रीहरु समेत संस्थालाई हस्तान्तरण गरिएको छ ।
हाल संस्थामा रहेका १३ जना अपाङ्ग असक्त वालवालिकाको खानपान साथै अन्य व्यवस्थापनकालागि वार्षिक रुपमा ६ लाख रुपैंयाँ खर्च हुँने गरेको संस्थाकी अध्यक्ष निर्मला ओझाले बताउँनुभयो । यसरी हुने खर्च व्यवस्थापनको दिगो स्रोत अन्य केही पनि नभई दाताहरुमै निर्भर हुँनु पर्ने भएकाले असक्त वालवालिकाको दैनिक जीवन धान्न धौ धौ पर्ने गरेको बताइएको छ ।
यहि समस्यालाई मध्यनजर गर्दै दाताले नगद १३ हजारसहित अतिआवश्यकीय सामाग्रीका साथ भोजन गराएका हुन् । भोजनसहितको आवश्यक सामाग्री म्याट ४ थान, फर्म एक रोल, झुल,तन्दा,डाइफर, लुगाकपडा, स्टीलको थाल, चम्चा,फिनेल, कापी, पेन्सिल, साबुन, सरफ लगायतका सामाग्री हस्तान्तरण गरिएको संस्थाका सचिव गोविन्द सुवेदीले बताउँनुभयो ।
सहयोग गर्ने दाताहरुमा जनक पौडेलसहित केदार घिमिरे, उत्तम निरौला, सोमनाथ तिम्सिना, राम भुजेल, योगेश अधिकारी, निशा घिमिरे, दिपक घिमिरे, दिपिका भट्टराई, हेमसागर र लक्ष्मी भट्टराई रहनुभएको बताइएको छ । बिगत १५ वर्षदेखि अमेरीका बस्दै आउँनुभएका सहयोगी दाताहरु ३५ वर्ष अघि भुटानको आन्दोलनबाट सरणार्थीका रुपमा नेपालमा १८ वर्ष विताएको अनुभव बताउँनुहुन्छ ।
पुकार अपाङ्ग अशक्त समाजकी अध्यक्ष निर्मला ओझाको सभापतित्व एवम् कनकाई ४ का वडा सदस्य रोशन सुवेदीको प्रमुख आतिथ्य रहेको सामाग्री हस्तान्तरण कार्यक्रममा दाताका तर्फबाट केदार घिमिरे र जनक पौडेलले असक्त वालवालिकालाई सहयोग गर्न पाउँदा खुशी लागेको बताउँनुभयो । कार्यक्रम व्यवस्थापनकालागि स्थानीय युवा समाजसेवी गंगा अधिकारीले सहजीकरण गर्नुभएको थियो ।
