कनकाई खबर \ नेपाल रेडक्रस सोसाइटी सुरुङ्गा उपशाखाको सभापतिमा सर्वसम्मत चयन भएका वालकृष्ण प्रसाईँले एक विशेष समारोहका विच संस्थाको पद भार ग्रहण गरेका छन् ।
सभापति प्रसाईँसँगै पदभार ग्रहण गर्नेहरुमा उपसभापति अम्बिका चापागाईँ सुवेदी, सचिव अर्जुन बोहोरा, कोषाध्यक्ष दिपक भट्टराई, उपसचिवमा यज्ञराज कार्की, उपकोषाध्यक्षमा हरिन्द्र कार्की समेतले पद तथा गोपनियताको सपथ लिएका छन् । यसरी पदभार ग्रहण गर्नेहरुमा महिला सदस्य गोमादेवी कार्की, अन्य सदस्यहरु कमल कट्टेल, सुमन कार्की, श्यामकुमार पौडेल र गोपालप्रसाद उप्रेतीले सपथ ग्रहण गरेका हुन् ।
उपशाखाको १४ औं साधारण सभा शनिवार सम्पन्न भएसँगै पुरानो कार्यसमितिको पदावधि समाप्त भएको थियो । संस्थाको नियमअनुसार साधारण सभाको बन्द सत्रमा संस्थाका सचिव र कोषाध्यक्षको प्रतिवेदन सर्वसम्मत भएसँगै नयाँ कार्यसमिति चयनकालागि नेपाल रेडक्रस सोसाइटी १ नं.प्रदेशका उपकोषाध्यक्ष प्रकाश खरेलको संयोजकत्वमा रहेको निर्वाचन मण्डलले सर्वसम्मत नेतृत्व चयनको भूमिका खेलेको बताइएको छ । यसरी सर्वसम्मत रुपमा चयन भएको कार्यसमितिले मंगलबार पदभार ग्रहण गरेको हो ।
नवनिर्वाचित सभापति वालकृष्ण प्रसाईसहित कार्यसमितिका सम्पूर्ण पदाधिकारी तथा सदस्यहरुलाई निर्वाचन समितिका सदस्य ओमप्रकाश गौतमले सपथग्रहण गराएका हुन् । सुरुङ्गा रेडक्रसको सभा हलमा सम्पन्न सपथग्रहण कार्यक्रममा उपशाखाका संस्थापक सभापति गेहनाथ उप्रेती, निवर्तमान सभापति प्रविन तिम्सिना लगायतको उपस्थिती रहेको थियो ।
कनकाई नगर क्षेत्रका सामाजिक संघसंस्थाहरुमा सर्वसम्मत नेतृत्व चयन गरी एकआपसमा सद्भाव कायम गर्ने उद्येश्यले सोही अनुरुपको अभियानमा लागेका मुख्य राजनीतिक दलहरु रेडक्रसको नेतृत्व चयनमा सफल भएका छन् । अन्य सामाजिक संघसंस्थाहरुको समेत सर्वसम्मत नेतृत्व चयनकालागि अभ्यासमा लागेका दलहरुलाई कनकाई उद्योग वाणिज्य संघमा भने ठेस लागेको अनुमान गरिएको छ । वाणिज्य संघमा कार्यसमितिकै कमजोरीका कारण तत्कालको वातावरण अन्योल बनेको संघको निर्वाचन समितिले जनाएको छ ।
