सुरुङ्गा \ कनकाई छठ सेवा समाजको पद हस्तान्तरण कार्यक्रम सम्पन्न भएको छ ।
छठसेवा समाजको पाँचौ साधारण सभा एवम् चौथो अधिवेशनवाट आगामी दुई वर्षे कार्यकालका लागि स्थानीय सामाजिक व्यक्तित्व सुरेन्द्र प्रधानको अध्यक्षतामा सर्वसम्मत रुपमा निर्वाचित भएको १३ सदस्यीय कार्यसमितिका पदाधिकारी तथा सदस्यहरुलाई निर्वाचन समितिका संयोजक जगतनारायण मण्डलले पदभार ग्रहण गराउँदै सपद ग्रहण गराएका छन् ।
यसरी सपद लिनेहरुमा नवनिर्वाचित अध्यक्ष प्रधानसँगै वरिष्ठ उपाध्यक्ष राजकिशोर चौधरी, उपाध्यक्ष विजयकुमार शर्मा, महासचिव राजकुमार शाह, सचिव नागेन्द्र शाह, कोषाध्यक्ष नरेश पोद्धार रहेका छन् भने महिला सदस्यमा ममता शाह र प्रमिला शाह साथै खुल्ला तर्फका सदस्यहरुमा कुलेश ठाकुर, विनोद चौधरी, नन्दकिशोर कारक, ओमप्रकाश पंजीयार र पुरन शहनी रहेका छन् ।
कार्यक्रमका प्रमुख अतिथी प्रदेश सभा सदस्य हीराकुमार थापा, समाजका संस्थापक अध्यक्ष उपेन्द्र प्रधान, पूर्व अध्यक्षहरु चन्दन शाह, किशनकुमार सोनी लगायतको सहयोगमा अध्यक्ष पवन शाहको गलामा भएको माला नवनिर्वाचित अध्यक्ष प्रधानलाई हस्तान्तरण गरीएको हो । पदभार ग्रहणसँगै नवनिर्वाचित अध्यक्ष प्रधानले समाजको समृद्धिका लागि छठ समाजको माध्यमवाट विभिन्न संघसंस्थाहरुसँग सहकार्य गरेर अघि बढ्ने प्रतिवद्धता जनाएका छन् । छठ समाजको प्रस्तावका रुपमा रहेको छठ वचत तथा ऋण सहकारी संस्था लि.को संचालनका लागि पहिलो वैठकवाट नै प्रक्रिया अघि बढाउँने साथै सूर्य भगवानको मन्दिर सहितको सामुदायिक भवनको निर्माण कार्यलाई तत्काल सुरुवात गर्ने समेत नवनिर्वाचित अध्यक्ष प्रधानले प्रतिवद्धता जनाएका छन् ।
कनकाई छठ सेवा समाजका अध्यक्ष पवन शाहको अध्यक्षता एवम् प्रदेश सभा सदस्य हीराकुमार थापाको प्रमुख आतिथ्य रहेको पद हस्तान्तरण तथा सम्मान कार्यक्रममा विर्तामोड छठ सेवा समाजका पूर्व अध्यक्ष प्रेमचन्द चौधरी लगायत संस्थालाई महत्वपूर्ण योगदान दिने केही व्यक्तित्वहरुलाई सम्मान गरीएको थियो । वरिष्ठ उपाध्यक्ष शिवशंकर महासेठको स्वागत तथा महासचिव खगेन्द्र महतोले संचालन गरेको कार्यक्रममा नेपाली कांग्रेसका नेता देउकुमार थेवे, समाजका सल्लाहकार नवलकिशोर दत्त, प्यारागन एकाडेमीकी संस्थापक अध्यक्ष चम्पा सुवेदी, समाजसेवी लिलाप्रसाद चिमरीया लगायतले शुभकामना मन्तव्य राखेका थिए ।
