कनकाई खबर \ कनकाई नगरपालिकाले ११२ औं अन्तर्राष्ट्रिय महिला दिवसको अवसर पारेर नगरपालिका क्षेत्रका तीनजना अटोरिक्सा चालक महिलालाई सम्मान गरेको छ ।
अटोरिक्सा कुदाएर परिवार पाल्दै आउनुभएका महिला चालकहरु दुर्गादेवी राई, लीला दास बर्देवा, शान्ता कार्की फुयाललाई एक विशेष कार्यक्रमका विच दोसल्ला ओढाएर नगद सहित सम्मान पत्रले सम्मान गरेको हो ।
कनकाई नगरपालिकाकी उपप्रमुख मन्जु प्रसाईको सभापतित्वमा सम्पन्न कार्यक्रममा संविधान सभाकी सदस्य अम्बिका खबास राजवंशी, कनकाई नगरपालिकाका प्रमुख राजेन्द्रकुमार पोखरेल लगायातले सम्मान गरेका हुन् ।
कार्यक्रमका अवसरमा महिलाहरुले सामुहिक डडियाँ नाच, गायन, कविता, नृत्य साथै विभिन्न प्रस्तुतीहरु दिएका थिए । कार्यक्रममा सहभागिहरुले महिलाहरु एकजुट हुन सकेमा कुनै पनि पुरुषले संघसंस्था साथै सबै किसिमका निर्वाचनको गतिविधिमा बिजयी हुन नसक्ने भन्दै नारी पुरुष समान नेतृत्वमा आउनुपर्नेमा जोड दिए ।
कनकाई नगरपालिकाको आयोजनामा ‘सामाजिक न्याय र लैङगिक समानता दिगो विकासको सुनिश्चितता’ भन्ने मुल नाराका साथ दुर्गापुरस्थित दलित सामुदायिक भवनमा कार्यक्रम सम्पन्न भएको हो ।
कार्यक्रममा कनकाई नगरपालिकाका वडाअध्यक्षहरु रुद्रप्रसाद चिमरिया, गोविन्द पौडेल, कृष्णबहादुर राई, लीलाबहादुर कन्दङवा, कार्यपालिका सदस्य कृष्णमाया भुजेल, एमाले कनकाईका अध्यक्ष खड्गप्रसाद प्रसाई, माओवादीका नगर अध्यक्ष यामनाथ सेडाईँ, जेष्ठ नागरिक संघ कनकाईका सचिव शम्भुप्रसाद पोखरेल, महिला नेतृ कविता बस्नेत, धनमाया चिमरीया लगायतले मन्तव्य राखेका थिए ।
हिंसाको अन्त्य साथै महिलालाई समान सहभागिताकालागि आवाज उठाउँनु पर्नेमा सहभागीहरुले जोड दिए । महिला तथा वालवालिका कनकाईकी प्रमुख टिका खतिवडाले संचालन गरेको कार्यक्रममा सहभगीहरुलाई कार्यपालिका सदस्य सावित्रा बर्देवाले स्वागत गरेकी थिइन् ।
