कनकाई खबर \ कनकाई ३ नमुना टोल स्थित शिव पाञ्चायन सामुदायिक भवनको पाँचौ साधारण सभा सम्पन्न भएको छ ।
महाशिवरात्रीको अवसर पारेर सम्पन्न साधारण सभामा संस्थाका उत्कृष्ट दाताका रुपमा चन्द्रविर कार्की, नारायण पोखरेल र रुद्र चिमरीया लगायत आर्थिक सहयोग गर्ने विभिन्न २८ जना दाताहरुलाई प्रशंसा पत्रसहितको सम्मान गरिएको छ । सम्मानित व्यक्तित्वहरुलाई कार्यक्रमका प्रमुख अतिथी महाराज किशोरानन्द भारद्वाजले प्रशंसा पत्रबाट सम्मान गरेका थिए । कार्यक्रममा संस्थाका अध्यक्ष लक्ष्मीप्रसाद भेट्वालले संस्थाको भावी योजनासहितको प्रगतिप्रतिवेदन प्रस्तुत गर्दै ७ लाख ६२ हजार ५ सय रुपैया समेटिएको आम्दानी तथा ६ लाख १६ हजार बराबरको खर्च समेटिएको आर्थिक प्रतिवेदन प्रस्तुत गरेका थिए ।
संस्थाका अध्यक्ष भेट्वालको सभापतित्व एवम् महाराज किशोरानन्द भारद्वाजको प्रमुख आतिथ्य रहेको कार्यक्रममा मन्दिरका दाता समाजसेवी देउमान थेवे, कनकाई ३ का वडाअध्यक्ष रुद्रप्रसाद चिमरीया लगायतले शुभकामना मन्तव्य राखेका थिए । शिव पाञ्चायन सामुदायिक भवनमा सम्पन्न कार्यक्रममा कलाकार माधव भेट्वालको सांगितीक प्रस्तुतीले सबैलाई नचाएको थियो । विभिन्न भजन मण्डलीसहित सन्तोषी माताको समेत उपस्थिती रहेको कार्यक्रममा सहभागी भएका एकहजार बढी भक्तजनहरुलाई प्रसाद वितरण गरिएको थियो । विविध साँस्कृतिक प्रस्तुतीसहितको औपचारिक कार्यक्रममा निता राईले स्वागत गरेकी थिइन् । कार्यक्रमको संचालन रेणु कडेलले गरेका थिए ।
