कनकाई \ ‘गरौं योग , रहौं निरोग ’ भन्ने अभियानलाई सफल पार्ने उद्येश्यले पतञ्जली योग कनकाई नगर समितिको आयोजनामा आइतवारदेखी बृहत योग विज्ञान शिविर संचालन भएको छ ।
कनकाई नगरपालिका वडा नं.५ स्थित भगवती आधारभूत विद्यालयमा एक सातासम्म चल्ने निशुल्क योग विज्ञान शिविरको कनकाई नगरपालिकाका प्रमुख राजेन्द्रकुमार पोखरेलले दिप प्रज्ज्वलन गरी कार्यक्रमको समुद्घाटन गरेका हुन् । योग शिविरको उद्घाटन कार्यक्रमलाई सम्वोधन गर्दै प्रमुख अतिथी नगरप्रमुख पोखरेलले शारिरीक र मानसिक रुपमा अस्वस्थ बन्दै गएको मानव समुदायलाई स्वस्थ वनाउँनका लागि योगअभ्यास मात्र एउटा विकल्प रहेको वताएका छन् । दिनप्रतिदिन व्यस्त बन्दै गएको आजको मानव समुदायले सकारात्मक सोचका साथ हरेक दिन व्यायाम गर्दै अघि बढ्ने हो भने दैनिक जीवन सहज बन्दै जाने कुरामा नगर प्रमुख पोखरेलले जोड दिएका छन् ।
पतञ्जली योग कनकाई नगर समितिका अध्यक्ष योगगुरु टिकाप्रसाद कट्टेलको सभापतित्व रहेको योग विज्ञान शिविरमा दुईसय बढी योगप्रेमी स्थानीयवासीको सहभागिता रहेको थियो । कार्यक्रमका संयोजक पुण्यप्रसाद ओझाले स्वागत तथा योग शिविरको कक्षा संचालन संयोजक एवम् बालगोपाल योग साधना केन्द्र भक्तपुरकी संयोजक जमुना सेलवालले कार्यक्रमको औचित्यमाथि प्रकाश पारेकी थिइन् ।
उद्घाटन कार्यक्रममा कनकाई नगरकी उपप्रमुख मन्जु प्रसाईं, पतन्जली योग समिति १ नं. प्रदेशका महामन्त्री योग गुरु लक्ष्मीप्रसाद काफ्ले, पतन्जली योग जिल्ला समिति झापाका अध्यक्ष योगगुरु देवीचरण घिमिरे,कनकाई नगर वडा नं.५ का अध्यक्ष कृष्ण राई, भगवती आधारभूत विद्यालयका अध्यक्ष ओम पाठक लगायतले मन्तव्य राखेको कार्यक्रममा महिला पतञ्जली योग समिति झापाकी अध्यक्ष प्रेमकला निरौला, पतञ्जली योग समिति झापाका सहसचिव रुद्र ओली, योग समितिका झापा गाउँपालिका अध्यक्ष भविन्द्र भण्डारी, भगवती आधारभूत विद्यालयका संस्थापक अध्यक्ष डिल्लीराम सेलवाल, प्रधानाध्यापक खड्गप्रसाद विमली, सामाजिक व्यक्तित्व गोकर्ण ओझा लगायत विभिन्न क्षेत्रवाट आएका योग गुरुहरुको आतिथ्यता रहेको थियो ।
पतञ्जली योग कनकाई नगर समितिका महासचिव रामप्रसाद निरौलाले संचालन गरेको योग शिविरको समुद्घाटन कार्यक्रममा स्थानीय विभिन्न १५ वटा संघ संस्थाहरु सह आयोजकका रुपमा रहेका छन् । यसरी सहआयोजकका रुपमा रहेका संस्थाहरुमा क्रमशः कनकाई नगर वडा नं.५, भगवती आधारभूत विद्यालय, बालगोपाल योग साधना केन्द्र भक्तपुर, प्रगतिपथ कृषि सहकारी संस्था, पञ्चेश्वर शिवालय मन्दिर, नवदुर्गा मन्दिर , पन्चकन्या किर्तन मण्डली ,सुनौलो युवा क्लव , आत्माजागरण सतसङ्ग मण्डली , मनोकामना किर्तन मण्डली , आत्माजागृति किर्तन मण्डली , एकता किर्तन मण्डली, कनकाई किर्तन मण्डली , पाथीभारा किर्तन मण्डली लगायत रहेका छन् । कनकाई नगरका नौवटै वडामा योग शिविर संचालन गर्दै जाने योजना भए अनुरुप यसपछि वडा नं.६ मा शिविर संचालन हुने वताइएको छ ।
