के.पी. लुइटेल,
कनकाई खबर (ईलाम सम्बाददाता) \ झापाको विर्तामोड—२ स्थित चारपानेमा केन्द्रिय कार्यालय रहेको सहारा नेपाल साकोसले दुई दिवसिय शाखा व्यवस्थापन तालिम सम्पन्न गरेको छ ।
जर्सिज ओभरसिज एड (जेओए) तथा ह्याबिटाट फर ह्युमिनिटि नेपालको आर्थिक सहयोगमा सम्पन्न तालिम मोरङको कृषि विकाश बैंकको तालिम केन्द्र लेटाङमा सम्पन्न भएको हो । सहारा नेपाल साकोसका झापा,मोरङ,इलाम,सुनसरी,पाँचथर र उदयपुर जिल्लामा रहेका अनुगमन कार्यालय अन्तर्गतका विभिन्न सेवाकेन्द्रमा कार्यरत ३० जना सेवाकेन्द्र प्रमुखहरुले तालिममा सहभागिता जनाएका थिए । सेवा केन्द्रको सञ्चालनमा र गुणस्तरिय सेवा प्रवाह गर्न आवश्यक विभिन्न पक्षहरुमा आफ्ना सेवा केन्द्रमा आउने सदस्यहरुसँग गर्नुपर्ने व्यवहार साथै बदलिँदो परिवेशमा संस्थाले खेल्नु पर्ने भूमिकाको बारेमा तालिम केन्द्रित रहेको बताइएको छ ।
सिभिल बैंक प्रदेश १ का प्रमुख राजेश ढकालले दुई दिनसम्म सहजिकरण गरेको कार्यक्रममा वर्तमान मौद्रिक तरलताको समस्या, नगद कारोवार गर्ने संस्थाका कर्मचारीहरुमा हुनुपर्ने आवश्यक सिप,ज्ञान,चेक(भुक्तानी भर्पाइ)का प्रकार तथा प्रयोगको अवस्थाका बारेमा जानकारी गराइएको थियो ।
कार्यक्रममा सरकारको निती तथा कानुन, सम्पत्ति शुद्धिकरण लगायत आर्थिक कारोवार गर्ने बैंक तथा वित्तिय संस्थामा कार्यरत कर्मचारीहरुले जान्नैपर्ने र बुझ्नै पर्ने विषयमा प्रष्ट पारिएको थियो । नेपाल सरकारले लागु गरेको कानुन,व्यवस्थित फायलिङ आदि विषयमा समेत जानकारी गराइएको थियो । सहभागीहरुलाई प्रमाणपत्र समेत वितरण गरीएको तालिम समापन सत्रलाई सम्बोधन गर्दै (जेओए) प्रोजेक्टका अनुगमन तथा मूल्याङ्कन अधिकृत किसन गौतमले तालिमबाट प्राप्त ज्ञान,सिपलाई आफ्नो कार्यक्षेत्रमा प्रभावकारी रुपमा कार्यान्वयन गर्न अनुरोध गरे ।
ह्याबिटाट फर ह्युमिनिटि नेपालका पूर्वान्चल क्षेत्रीय प्रमुख रामवहादुर श्रेष्ठले तालिमलाई आर्थिक सहयोग गरेको र त्यसको सार्थकता चाहि सहभागिहरुको कार्यान्वयनले देखाउने बताए । श्रेष्ठले आफूले पनि लामो समय संघसंस्थामा रहँदा लिएको तालिमबाट प्राप्त उपलव्धीका बारेमा समेत आफ्नो अनुभव बताएका थिए । आफू कार्यरत संस्थाको संक्षिप्त परिचय गराउँदै आयोजकसँगको सम्बन्धका बारेमा समेत क्षेत्रीय प्रमुख श्रेष्ठले जानकारी दिए ।
कार्यक्रममा सहभागिहरुका तर्फबाट सरिता गिरी, के.पी.लुईटेल, दामोदर भट्टराई, पदम सापकोटा, विवेक काफ्ले , महेन्द्रप्रसाद राजवंशी लगायतले तालिमबाट प्राप्त विषयवस्तुहरु वर्तमान अवस्थामा अत्यन्तै आवश्यकता साथै उपलव्धीमूलक रहेको बताए ।
तालिमबाट प्राप्त ज्ञान, सिप वित्तिय संघसंस्थामा कार्यरत कर्मचारीहरुलाई बोध हुनैपर्ने साथै ‘गरे कानुन बाट बचिन्छ, नगरे कानुन लाग्छ’ भन्ने कुराको सन्देश प्राप्त भएको सहभागीहरुले प्रतिक्रिया दिए ।
तालिमबाट सिकेको कुराले आफूले संस्थामा गरिने दैनिक क्रियाकलापमा प्रभावकारी कार्यसम्पादन गर्न उर्जा प्राप्त भएको भन्दै तालिममा सहभागीहरुले यस किसिमको तालिमबाट संस्थाको शाखमा समेत वृद्धि गर्न सकिने बताएका छन् । सहारा नेपाल साकोस केन्द्रिय कार्यालय अन्तर्गतका तालिम अधिकृत मातृका सुवेदीले कार्यक्रमको सहजीकरण गरेका थिए ।
