कनकाई खबर \ झापा गाउँपालिकाको वडा नं. ३, ६ र ७ लाई समेटिएको रानी सामुदायिक वन उपभोक्ता समितिको २० औं साधारण सभा सम्पन्न भएको छ ।
वन समूहका अध्यक्ष नरेन्द्रकुमार आङदम्बेको सभापतित्व एवम् झापा गाउँपालिका ६ का वडाअध्यक्ष हरीबहादुर बानीयाँको प्रमुख आतिथ्य रहेको साधारण सभामा अध्यक्ष आङदम्बेले भावी योजनासहितको प्रगति प्रतिवेदन प्रस्तुत गरेका थिए । कार्यक्रमका प्रमुख अतिथी बानीयाँले लामो इतिहास बोकेको रानी सामुदायिक बन झापा गाउँपालिकाकै सम्पदा भएकाले यहाँ माटो सुहाउँदो बिरुवा रोपेर बनलाई हराभरा बनाउन जोड दिए ।
वडा नम्बर ७ का वडाध्यक्ष नेत्रप्रसाद उप्रेती, पुर्व सचिव प्रेम प्रसाद पाठक, राम प्रसाद उप्रेती, केशब बजगाई, विश्वनाथ राजबंशी लगायतले शुभकामना मन्तब्य राखेका थिए । वन समितिको स्थापनामा विशेष योगदान पुर्याएका राजबंशीले रानी वनको संरक्षण पञ्चायतकालदेखि गरिएको भन्दै रानी बनको नामाकरण भएको इतिहास सुनाए । उनले राजा महेन्द्रले सिकार खेलेको ठाउँ भन्दै इतिहासको स्मरण गराएका थिए ।
साधारण सभाको वन्द सत्रले तीन वर्ष अवधि पूरा गरेको वर्तमान कार्य समिति बिघटन गरी ७ सदस्यीय निर्वाचन मण्डल गठन गरेको छ । आगामी तीन वर्षे कार्यकालको नेतृत्व चयनकालागि निर्वाचन मण्डल गठन भएको हो । स्थानीय युवा समाजसेवी केशब बजगाईंको संयोजकत्वमा गठित ७ सदस्यीय निर्वाचन मण्डलमा पुष्पा प्रसाईं, प्रदिप जोसी, मोहन मिश्र, भविन्द्र भण्डारी, कमला श्रेष्ठ र प्रेम पाठक सदस्य रहेका छन् ।
निर्वाचन मण्डलीले सर्वपक्षिय भेला बोलाई नयाँ कार्य समिति चयनको बाटो सजिलो बनाउने संयोजक बजगाईंले बताए । सबैसँग छलफल गरेर सर्वसम्मतको प्रयासकालागि निर्वाचन समितिले भूमिका खेल्ने संयोजक बजगाईँले जानकरी दिए ।
वन समूहका उपाध्यक्ष कमल गनगाईंले स्वागत गरेको औपचपारिक कार्यक्रमको संचालन सचिव पुष्पा प्रसाईले गरेकी थिइन् ।
