कनकाई खबर / झापाको कनकाईमा पशु स्वास्थ्य तथा बाँझो पन निवारण सम्बन्धि वृहत घुम्ती शिविर सम्पन्न भएको छ ।
एक हप्ता सम्म संचालन भएको घुम्ती शिविरमा उपस्थित कृषकहरुलाई सम्बोधन गर्दै कनकाई नगरपालिकाका प्रमुख राजेन्द्र पोखरेलले निर्वाचनका समयमा गरेका बाचा क्रमिक रुपले पूरा गर्ने क्रममा नगरका हरेक टोल टोलमा पशु स्वास्थ्य शिविर संचालन गरेको बताएका छन् । अघिल्ला वर्षहरुमा समेत संचालन गरेको पशु स्वास्थ्य शिविरलाई यस वर्ष अलिक वृहत रुपमा अघि बढाइएको नगर प्रमुख पोखरेलले बताए । कृषि तथा पशुपालनका क्षेत्रमा आत्मनिर्भर बन्दै आएका नगरवासीलाई प्राथमिक्तामा राखेर स्थानीय सरकारले घर घरमै सेवा पुर्याउँने उद्येश्यका साथ हेफर पोजेक्ट नेपालको प्राविधिक सहयोग साथै अभियान नेपालको सहजिकरणमा निशुल्क पशु स्वास्थ्य शिविर संचालन गरेको बताइएको छ । कनकाई नगर क्षेत्रका बढी भन्दा बढी कृषकहरुलाई लाभान्वित गराउँने उद्येश्यका साथ नगरका नौ वटै वडाको विभिन्न २८ वटा स्थानमा सेवा केन्द्र स्थापना गरी घुम्ती शिविर संचालन गरिएको नगर प्रमुख पोखरेलले जानकारी दिएका छन् ।
नगर क्षेत्रका प्रत्येक वडामा आवश्यक्ता अनुसार तीनदेखी पाँचवटा सम्म सेवा केन्द्र स्थापना गरेर सम्पन्न पशु स्वास्थ्य शिविरबाट घर घरमै सिंह दरबार आए झैं महशुस गराएको कनकाई १ का कृषक लक्ष्मीप्रसाद बराल बताउँछन् । कृषकहरुको पशुधनको स्वास्थ्य सुरक्षालाई मध्यनजर गर्दै स्थानीय सरकारबाट भएको घुम्ती शिविर साथै निशुल्क औषधि वितरणको कार्यक्रमले कृषि तथा पशुपालनमा थप हौसला मिलेको कृषक बरालले बताए ।
कृषि तथा पशुपालनका क्षेत्रमा हरेक टोल टोलमा नगरपालिकाले संचालन गरेको घुम्ती शिविरबाट आँफूहरु अत्यन्तै प्रभावित भएको भन्दै कनकाई ७ का कृषक सुवास शिवाकोटीले खुशी व्यक्त गरेका छन् । कृषि तथा पशुपालनमा आत्मनिर्भर भएका ग्रामिण क्षेत्रका किसानकालागि कनकाई नगरपालिकाले ल्याएको योजना वास्तवमै उदाहरणीय रहेको कृषक शिवाकोटीले बताए ।
कनकाई नगरपालिकाको आर्थिक सहयोग तथा हेफर पोजेक्ट नेपालको प्राविधिक साथै अभियान नेपालको सहजिकरणमा सम्पन्न कृषि तथा पशुपालन उद्यमशिलता विकास परियोजना अन्तर्गतको घुम्ती शिविरमा नगरपालिकाले १६ लाखको बजेट व्यवस्थापन गरेको कार्यक्रम संयोजक हरिप्रसाद सिलवालले जानकारी दिए । जस मध्ये दुई लाख रुपैंया प्राविधिक खर्च साथै अन्य १४ लाख बराबरको औषधि निशुल्क वितरण गरिएको परियोजनाका संयोजक सिलवाल बताउँछन् । कार्यक्रम संयोजक सिलवालका अनुसार शिविरमा गाईभैंसीको बाँझो पनको परिक्षण साथै आवश्यक औषधि वितरण गरिएको थियो । त्यस्तै सबै जातका अन्य पशु चौपायको स्वास्थ्य परिक्षणका साथै रेविज भेक्सिन, बोका,सुँगुरको बन्ध्याकरण भिटामिन, क्याल्सियम, जुका नाम्लेको औषधि लगायत निशुल्क वितरण गरिएको बताइएको छ ।
कनकाई नगरपालिकाको पशु स्वास्थ्य प्राविधिकसहित अन्य जनशक्ति समेत गरी २४ जना प्राविधिकहरुले एक हप्तासम्म दैनिक दुई समूहमा विभाजन भई शिविर संचालन गरेको पशु स्वास्थ्य कार्यालय कनकाईका प्रमुख तेजबहादुर पौडेलले जानकारी दिए । नगर क्षेत्रमा रहेका सबै किसिमका व्यक्तिगत साथै सामुहिक पशुपालक कृषकको घर घरमा गएर पशु स्वास्थ्य विमाको समेत कार्यक्रमलाई चुस्त दुरुस्त बनाउँन नगर प्रमुख राजेन्द्र पोखरेलले बनाएको दिर्घकालिन योजना अनुरुप अब प्रत्येक वडामा पशु स्वास्थ्य प्राविधिकको समेत व्यवस्था गरिएको पशु स्वास्थ्य कार्यालय कनकाईका प्रमुख पौडेलले बताए ।
