कनकाई खबर \ कनकाईलाई बालमैत्री नगरका रुपमा घोषणा गर्ने तयारीमा जुटेको कनकाई नगर बाल संजालले आफ्ना गतिविधिहरुलाई तिब्रताका साथ अघि बढाउँन थालेको छ ।
बालमैत्री अवधारणा सम्बन्धी अन्तरक्रिया तथा अभिमुखीकरण कार्यक्रम संचालन गर्दै आएको कनकाई नगर बाल संजालले आइतबार(आज) नगरपालिकाको सभा हलमा बाल मैत्री अन्तरक्रिया कार्यक्रम सम्पन्न गरेको छ । नगर बाल संजालका अध्यक्ष अभिषेक मिश्रको सभापतित्व एवम् कनकाई नगरपालिकाका प्रमुख राजेन्द्र पोखरेलको प्रमुख आतिथ्य रहेको अन्तरक्रिया कार्यक्रमलाई सम्बोधन गर्दै नगर प्रमुख पोखरेलले कनकाईलाई बालमैत्री नगर बनाउँने अभियानमा स्थानीय सरकारका तर्फबाट कुनै कसुर बाँकी नराख्ने प्रतिवद्धता जनाएका छन् । जनप्रतिनिधिहरुले स्थानीय तहको जिम्मेवारी सम्हालेसँगै बालमैत्री नगर निर्माणमा अभियान संचालन गर्दै आएको नगर बाल संजालको रचनात्मक कार्यप्रति आँफू प्रभावित भएको बताउँदै नगर प्रमुख पोखरेलले बाल अधिकारको रक्षाकालागि सम्बन्धित निकायका पदाधिकारीहरु समेत गम्भिर हुनु पर्नेमा जोड दिएका छन् ।
कार्यक्रममा नगर उप प्रमुख मन्जु प्रसाईं , बालकल्याण अधिकारी उमानाथ ढकाल, बालबालिका तथा शिक्षा संचार मञ्चका अध्यक्ष सरोज पौडेलले आ—आफ्नो धारणा राख्दै बालमैत्री नगर निर्माणको अभियानमा अघि बढेको कनकाई नगर बाल संजालको सफलताको कामना गरेका थिए ।
नगर बाल संजालका संस्थापक अध्यक्ष नविन गौतम, पुर्व अध्यक्षहरु सारिका गिरी, हिमांशु उप्रेती, निवर्तमान अध्यक्ष खेमराज चापागाई लगायतले पछिल्लो समय बालबालिकालाई हेर्ने दृष्टिकोणमा केही परिवर्तन आएको धारणा राख्दै नगर क्षेत्रका बालबालिकालाई एक जुट भएर अघि बढ्न अनुरोध गरेका छन् । नगर बाल संजालका सदस्य अभिषेक बुढाथोकीले स्वागतसहित औचित्यमाथि प्रकाश पारेको औपचारिक कार्यक्रमको संचालन सचिव सार्थक निरौलाले गरेका थिए ।
सोही अवसरमा संस्था स्थापनाकालमा संस्थाप्रति पुर्याएको योगदानको उच्च मुल्याङ्कन गर्दै नगर बाल संजालका संस्थापक अध्यक्ष गौतमलाई सम्मान समेत गरिएको थियो । अध्ययनको सिलसिलामा अष्ट्रेलियामा रहेका गौतमले विदाको समय पारी घर आएको मौकामा आज (आइतबार) नै परेको आफ्नो जन्म दिन असक्त बालबालिकाहरुसँग मनाएका छन् । गौतमले जन्म दिनको अवसरमा कनकाई ४ स्थित पुकार अपाङ्ग असक्त समाजका वालवालिकालाई चामल,दाल, तेल,बिस्कुट लगायतका खाद्य सामाग्री वितरण गरेको नगर बाल संजालका सचिव सार्थक निरौलाले जानकारी दिए ।
