कनकाई खबर \ लायन्स क्लव अफ कनकाई सुरुङ्गाको सप्ताह व्यापी सामाजिक सेवाको कार्य सम्पन्न भएको छ ।
अन्तर्राष्ट्रिय रुपमा मान्यता प्राप्त सामाजिक संस्था लायन्स क्लव अफ कनकाई सुरुङ्गाले आफ्नो वार्षिक क्यालेण्डर अनुसार नै सप्ताहव्यापी सामाजिक सेवाको कार्यक्रम सम्पन्न गरेको क्लवका अध्यक्ष डम्बर थापा (साजन) ले जानकारी दिए । पुष २६ गतेदेखि सुरु भएको लायन्सको सप्ताहव्यापी सामाजिक सेवाको कार्य संस्थाको सामाजिक उत्तरदायित्व अन्तर्गत विविध सेवामूलक कार्यका साथ सम्पन्न भएको अध्यक्ष थापाले बताएका छन् । यसै क्रममा पुष २६ गते अन्तरक्रिया कार्यक्रम सम्पन्न गरिएको थियो भने २७ र २८गते कनाईको वडा नंं.३ द्वारा वितरण गरिएको कोरोना विरुद्धको खोप कार्यमा क्लवका तर्फबाट सहजीकरण गरेको बताइएको छ ।
त्यस्तै २९ गते लायन्स र लियो क्लव अफ कनकाई सुरुङ्गाको संयुक्त आयोजनामा सम्पन्न रक्तदान कार्यक्रममा ६२ जनाले रक्तदान गरेका थिए । नेपाल रेडक्रस सोसाइटी विर्तामोड रक्तसंचार सेवा साथै न्युरो फार्मेसी सुरुङ्गाको प्राविधिक सहयोगमा रक्तदान कार्यक्रम सम्पन्न भएको क्लवका द्वितीय उपाध्यक्ष गंगाराम गजुरेल(सञ्जय) ले बताएका छन् । त्यस्तै क्लवको सप्ताह अन्तर्गतको पुष ३० गतेका दिन लायन्सका जन्मदाता मेल्भिन जोन्सको १४३ सौँ जन्मदिनको अवसर परेकाले सोही दिन फेलोसिप कार्यक्रम सम्पन्न गरिएको उपाध्यक्ष गजुरेलले जानकारी दिए ।
त्यसैगरी मकर संक्रान्तीका दिन माघ १ गते कनकाई माइमा मकर स्नान गर्न आएका भक्तजनहरुलाई २ हजार थान मास्क वितरण गरेर कोरोना संक्रमणको न्युनीकरणकालागि सचेतना जगाएको लायन्स क्लव अफ कनकाई सुरुङ्गाका प्रथम उपाध्यक्ष डिआर सुवेदीले बताएका छन् । सप्ताह अन्तर्गत क्लवका अध्यक्ष डम्बर थापाको सभापतित्वमा माघ २ गते कोटीहोमस्थित गायत्री मन्दिरमा न्यानो कपडा वितरण कार्यक्रम सम्पन्न भएको छ । मन्दिरमा रहेका जेष्ठ मातापितालाई जाडोको न्यानो ज्याकेट साथै फलफूल लगायतका खाद्य सामाग्री वितरण गरेको क्लवकाा उपाध्यक्ष सुवेदीले कनकाई खबरलाई जानकरी दिए । ।
