कनकाई खबर \ झापाको पवित्र नदि कनकाई माइको आसपासमा परम्परागत रुपमा लाग्दै आएको धार्मिक तथा रमाइलो माइमेला यस पटक नलाग्ने भएको छ ।
कोभिड १९ को संक्रमणदरलाई मध्यनजर गर्दै माइमेला नलगाउँने निर्णय भएको कनकाई नगरपालिकाका प्रमुख राजेन्द्र पोखरेलले बताएका छन् । कनकाई नगरपालिका र शिवसताक्षी नगरपालिकाका प्रमुख साथै प्रतिनिधिहरु तथा प्रहरी प्रमुखहरु सहित कनकाई नगरपालिकाको कार्यालयमा सोमबार भएको बैठकबाट माइमेला नलगाउँने निर्णय भएको बताइएको छ । यसअघि पुस २८ गतेदेखि माघ २ गतेसम्म कनकाई माइको दुबै किनारामा मेला लगाउनका लागि ठेक्का समेत लगाइएको थियो । मेला संचालनकालागि सम्बन्धित पालिकाहरुले ठेक्का आह्वान गरे अनुसार पर्न आएका बोल पत्र तथा दरभाउ पत्रहरु रद्ध गरी सम्बन्धित व्यक्ति तथा फर्महरुले दर भाउ पत्रका साथ पेश गरेको धरौटी रकम समेत फिर्ता दिने निर्णय भएको बताइएको छ ।
कनकाई माइको पश्चिमी किनारमा शिवसताक्षी नगरपालिकाले साथै पुर्वी किनारमा कनकाई नगरपालिकाले ठेक्का लगाएर व्यवस्थित माइमेला संचालन गर्दै आएका थिए । माइमेला भर्न र मकर स्नान गर्न नेपालका विभिन्न स्थान साथै भारतबाट समेत ठूलो सङ्ख्यामा भक्तजनहरु आउने गरेका थिए ।
नेपाल सरकारको सिसिएमसीको बैठकको निर्णयपछि दुवै पालिकाले मेलाका ठेकेदारहरुको रकम फिर्ता दिने निर्णय गरिएको शिवसताक्षी नगरपालिकाका प्रमुख चन्द्रकुमार शेर्माले बताए । बैठकमा कनकाई नगरपालिकाकी उपप्रमुख मन्जु प्रसाई, शिवसताक्षी नगरपालिकाकी उपप्रमुख भोजकुमारी नेपाल, कनकाई नगरपालिकाका प्रमुख प्रशासकीय अधिकृत मोहनप्रसाद न्यौपाने, ईलाका प्रहरी कार्यालय बिर्तामोडका प्रहरी प्रमुख सन्तोष आचार्य, कनकाई नगरपालिकाका प्रवक्ता एवम् वडा नं.—४का वडाअध्यक्ष गोविन्द पौडेल, कनकाई—१का वडाअध्यक्ष रोषनराज पोखरेल, इलाका प्रहरी कार्यालय सुरुङ्गाका प्रहरी प्रमुख मानबहादुर जिम्बा लगायतको उपस्थिती रहेको कनकाई नगरपालिकाका कर्मचारी लक्ष्मीप्रसाद अधिकारीले जानकारी दिए ।
