कनकाई खबर \ देशको शासन संचालन गरिरहेका प्रमुख राजनीतिक दलहरुले राजनीतिप्रति जनताको आकर्षण बढाउँन थप जिम्मेवार बन्नु पर्ने तर्फ नेपाली कांग्रेसका महामन्त्री विश्वप्रकाश शर्माले जोड दिएका छन् ।
झापाको कनकाईमा प्रजातान्त्रिक आन्दोलनका अगुवा नेता स्वर्गीय तुर्सा हेमरमको २४ औं स्मृति दिवसको अवसरमा आयोजित स्मृति सभालाई सम्बोधन गर्दै कांग्रेस नेता शर्माले राजनीतिक दलहरुले सामाजिक एकता कायम गरेर अघि बढ्नु पर्ने तर्फ जोड दिए । मुलुकको समृद्धिकालागि पनि शासन व्यवस्था स्थिर हुनु पर्ने भन्दै नेता शर्माले विचार अलग भएपनि उद्येश्य एउटै बनाएर साझा सहमतिमा अघि बढ्न सकेमा कसैले निराश बन्नु नपर्ने धारणा राखेका थिए ।
सबैकोे भावना एक बनाएर देशलाई समृद्धिको यात्रामा अघि बढाउँनु पर्ने तर्फ जोड दिँदै नेता शर्माले पिछडिएका समुदायलाई माथी उठाउने काममा सबै राजनीतिक दल एक ठाउँमा उभिनु पर्ने धारणा राखे । कार्यक्रमकै अवसरमा नेता शर्माले आफूले पनि सन्थाल समुदाय लगायत पछाडी परेका जातीलाई माथी उठाउने कार्यमा सधैं अग्रस्थानमा रहेर भूमिका खेल्ने समेत प्रतिवद्धता जनाएका छन् ।
कनकाई नगरपालिका १ स्थित नगरपालिकाको कार्यालय नजिकै निर्माणाधीन तुर्सा हेमरम स्मृति प्रतिष्ठान परिसरमा आयोजना गरिएको विविध साँस्कृतिक प्रस्तुती सहितको स्मृति सभामा स्व.नेता हेमरमको राजनीतिक योगदान र जीवनीका बारेमा चर्चा गरिएको थियो । विविध सन्थाल नृत्य साथै विभिन्न स्थानबाट आएका सन्थाल कलाकारहरुले सन्थाली गीत प्रस्तुत गरेका थिए । कार्यक्रममा स्थानीय कलाकार खड्ग रायमाझी, सन्तोष रायमाझी र कुमार पालुङ्वाले प्रस्तुत गरेको गीतले सहभागीहरुलाई नचाएको थियो । त्यसैगरी सन्थाल युवाहरुबिच छेलो , दौड, लङजम्प र धनुष काँड प्रतियोगिता गराईएको थियो ।
प्रतिष्ठानका उपाध्यक्ष लखन हेमरमको सभापतित्वमा सम्पन्न कार्यक्रममा प्रमुख अतिथिका रुपमा रहेका महामन्त्री शर्माले साधा जीवन र उच्च विचार भएका तुर्सा हेमरमले बी.पी. को अत्यन्तै निकट रहेर प्रजातान्त्रिक आन्दोलनमा महत्वपूर्ण योगदान पु¥याएको चर्चा गरे । प्रतिष्ठानकी उपाध्यक्ष टिका मैनालीको स्वागत तथा सचिव कुमारमणि पोखरेलले संचालन गरेको कार्यक्रममा सन्थाल अगुवा बडाराम हेमरम, संविधानसभा सदस्य मोहन टुडु, नेपाली कांग्रेस झापा उपसभापित केशवराज पाण्डे, केन्द्रिय सदस्य शुशिला ढकाल, अग्रज नेता पूर्णनन्द शर्मा, पूर्व सासंद डिल्ली सिटौला, कनकाई नगरपालिकाका प्रमुख राजेन्द्र पोखरेल लगायतले शुभकामना मन्तव्य राखेका थिए ।
सन्थाल समुदायमा जन्मिएका हेमरमले बी.पी. र कांग्रेस नेता समाजवादी चिन्तक सि.के.प्रसाईको अत्यन्तै निकट रहेर राजनीति गरेको स्मरण गर्दै कार्यक्रममा सहभागी वक्ताहरुले स्व.हेमरम प्रजातन्त्रप्रति निष्ठावान नेताका रुपमा रहेको बताएका थिए । वि.सं. १९८० सालमा जन्मेका तुर्सा हेमरमको वि.सं २०५४ साल पुस २० गते निधन भएको थियो । झापाको शरणामतिमा हेमरमको स्थायी बसोबास रहेको थियो । प्रजातन्त्र सेनानी सम्मान समेत प्राप्त गरेका हेमरम सामान्य परिवारमा जन्मिएपनि राजनीतिक चेत, विचार र संगठन गर्ने कार्यमा अत्यन्तै सफल रहेको बताइएको छ ।
