कनकाई खबर \ कनकाई ८स्थित हिमाली माविका विद्यार्थीलाई जाडोको कपडा सुइटर वितरण गरिएको छ ।
काठमाण्डौस्थित चैतन्य जागृति समूहको सहयोगमा उपलव्ध भएको जाडोमा लगाउँने सुइटर विद्यालयका १५० विद्यार्थीहलाई वितरण गरिएको हो । विद्यालय परिसरमा आयोजित एक संक्षिप्त कार्यक्रममा चैतन्य जागृति समूहका प्रतिनिधि नारायण ओली, कृष्णप्रसाद चुडाल साथै कार्यक्रमका प्रमुख अतिथी कनकाई ८ का वडाअध्यक्ष प्रेमवहादुर कटुवाल लगायतले विद्यालयका विद्यार्थीलाई सुइटर वितरण गरेका हुन् । विद्यालय व्यवस्थापन समितिका अध्यक्ष नेत्रप्रसाद नेपालको अध्यक्षता एवम् प्रधानाध्यापक धर्मानन्द निरौलाले स्वागतसहित औचित्यमाथि प्रकाश पारेको औपचारिक कार्यक्रमको शिक्षिका चित्रकला ओलीले संचालन गरेकी थिइन् । कार्यक्रममा प्रमुख अतिथी कटुवाल सहित दाता प्रतिनिधिका तर्फबाट कृष्णप्रसाद चुडाल र नारायण ओलीले शुभकामना मन्तव्य राखेका थिए ।
यस अघि पनि विभिन्न दाताहरुबाट ८० थान सुुइटर विद्यालयका विद्यार्थीहरुलाई वितरण गरिएको विद्यालयका प्रधानाध्यापक निरौलाले जानकारी दिएका छन् । दाता जानुका र भीमनारायण सन्जेलको परिवारबाट ३० थान सुइटर उपलव्ध भएको हो भने स्थानीय रणदेव हजाम, सोम गौतम, पुजा राउत, रामनारायण शाह लगायत अन्य केही दाताहरुको सहयोगमा ५० थान सुइटर साथै जुत्ता मोजा समेत उपलव्ध भएको बताइएको छ ।
केही समय अघि मात्र घैलाडुवास्थित आदर्श माविबाट सरुवा भई आएका प्रधानाध्यापक धर्मानन्द निरौलाले जिम्मेवारी सम्हाले यता दाताहरुबाट प्राप्त सुइटर हिमाली माविका नर्सरीदेखि कक्षा पाँच सम्मका २सय ५० विद्यार्थीलाई वितरण भइसकेको बताइएको छ । दाताहरुबाट प्राप्त सहयोगले विद्यालयको शैक्षिक गुणस्तर वृद्धिकालागि थप टेवा पुग्ने भन्दै प्रधानाध्यापक निरौलाले दाताहरु सबैप्रति आभार प्रकट गरेका छन् ।
