कनकाई खबर \ झापाको कनकाई ७ दुर्गापुर बजार निवासी माओवादी केन्द्रका नेता चन्द्रमान कन्दङवाको निधन भएको छ ।
माओवादी केन्द्र कनकाईका पूूूर्व संयोजक तथा हालका जिल्ला सदस्य समेत रहेका ६७ वर्षीय कन्दङवाको उपचारका क्रममा आज सोमबार विहान भारतको सिलिगुडीस्थित सैनिक अस्पतालमा निधन भएको मृतकका आफन्त कनकाई ७ का वडाअध्यक्ष समेत रहेका लिलावहादुर कन्दङ्वाले वताएका छन् ।
भारतीय सैनिक सेवाको २८ वर्ष लामो सेवा पूरा गरी अनरी क्याप्टनको जिम्मेवारीबाट यस अघि नै सेवा निवृत्त भएका कन्दङवा चार दिन अघि सुक्रबार विहान मस्तिष्क घात भई अस्वस्थ भएका थिए । तत्काल विर्तामोडको विएण्डसी हस्पिटलमा भर्ना गरिएको भएपनि शनिवार बेलुका कन्दङ्वालाई दुर्गापुरस्थित निजी निवासमा ल्याइएको थियो । त्यसपछि पनि राती नै विएण्डसी लगिएका कन्दङ्वालाई थप उपचारकालागि भारतस्थित सैनिक अस्पताल लगिएको थियो ।
कन्दङवाका श्रीमति चन्द्रकला, छोरावुहारी स्व. कुमार र कान्ती, दिपक र जानुका, भरत र बन्दना, प्रदिप र याक्सा, प्रकाश कन्दङवा रहेका छन् । विभिन्न सामाजिक संघसंस्थाहरुको नेतृत्व तहमा रहेर कार्य सम्पादन गरिसकेका कन्दङ्वा हाल दुर्गापुर सामुदायिक भवनका अध्यक्ष, भवानी खानेपानीका उपाध्यक्ष, नेकपा माओवादी केन्द्रका जिल्ला कमिटि सदस्य, किराँत याक्थुङ चुम्लुङका कनकाई नगरका सल्लाहकार, भृकुटी माविका सल्लाहकार, नेपाल बहुउद्येश्यीय सहकारी संस्थाका दुर्गापुर कार्यालयगत समितिका सदस्य समेत रहेका कन्दङ्वाको निधनले सामाजिक क्षेत्रमा ठूलो क्षति पुगेको बताइएको छ ।
उपचारकै क्रममा रहेका कन्दङवाको आज भएको असामयिक निधनप्रति कनकाई खबर साप्ताहिक तथा अनलाइन परिवारले दुःख व्यक्त गर्दै शोकसन्तप्त परिवारजनप्रति धैर्यधारण गर्ने ईश्वरीय शक्ति प्राप्त होस् भन्दै हार्दिक श्रद्धा सुमन अपर्ण गरेको छ ।
