कनकाई खबर / नेपाली कांग्रेसले पार्टीका संस्थापक विश्वेश्वरप्रसाद कोइराला (बीपी) लगायतका नेता लामो निर्वासन अन्त्य गरी स्वदेश फर्किएको दिन पुस १६ गतेलाई हरेक वर्ष ‘राष्ट्रिय एकता तथा मेलमिलाप दिवस’का रूपमा मनाउँदै आएको छ ।
यसै सन्दर्भमा कांग्रेस झापा क्षेत्र नं. ४ ले सुक्रबार सुरुङ्गास्थित कांग्रेस नगर समितिको पार्टी कार्यालयमा राष्ट्रिय एकता तथा मेलमिलाप दिवसको कार्यक्रम सम्पन्न गरी ४६औँ मेलमिलाप दिवस मनाएको छ । नेपाली कांग्रेस क्षेत्रीय सभापति जयनारायण शाहको सभापतित्व एवम् १ नं. प्रदेश समिति सदस्य किरण भट्टराईको प्रमुख आतिथ्य रहेको कार्यक्रममा बी.पी.को राष्ट्रिय एकता तथा मेलमिलापको नीतिका बारेमा चर्चा गरिएको कांग्रेस झापा क्षेत्र नं.४ ‘ख’ का प्रदेश सभापति ख्यामराज सिटौलाले बताएका छन् ।
प्रदेश सभापति सिटौलाले स्वागत तथा क्षेत्रीय सचिव रुपनारायण खतिवडाले संचालन गरेको कार्यक्रममा कांग्रेस झापाका उपसभापति केशव पाण्डे,सहसचिव कमल भण्डारी, जिल्ला सदस्य लिलाप्रसाद चिमरीया, क्षेत्र नं.४ (क) का सभापति विनोद ढकाल, महाधिवेशन प्रतिनिधि कविता बस्नेत र परशुराम ढुङ्गाना, प्रदेश प्रतिनिधि मनोज पोखरेल, झापा गाउँपालिका उपसभापति सखीचन ठाकुर लगायतले बिपीले प्रजातन्त्र र समाजवादका नाममा अघि सारेको दृष्टिकोण अहिले पनि नेपालमा सान्दर्भिक र अपरिहार्य रहेको बताएका थिए ।
मुलुकको सार्वभौम सत्ता रक्षा गर्न जनताकै बीचमा रहनुपर्दछ भन्ने सोचका साथ नेपालका प्रथम जननिर्वाचित प्रधानमन्त्री विश्वेश्वरप्रसाद कोइराला लगायतका नेता मेलमिलापको नीति लिएर विसं २०३३ पुस १६ गते स्वदेश फर्केका थिए।
दक्षिण एशियामा देखिएको तत्कालीन राजनीतिक सङ्क्रमणबाट नेपाललाई बचाउन आफूमाथिको मृत्युदण्डको मुद्दालाई समेत बेवास्ता गर्दै त्यसबेला स्वदेश फर्किएका कांग्रेस नेता बीपी कोइरालाले मुलुकको सार्वभौम सत्ता रक्षाका लागि जनशक्ति (राजनीतिक दल) र राजशक्ति (राजा) मिल्नुपर्ने धारणा राखेका थिए।
तत्कालीन अवस्थामा नेपालको सार्वभौम सत्ता नै गुम्ने खतरा देखेपछि स्वदेश फर्किएका नेता बीपी कोइराला, गणेशमान सिंहलगायतलाई विमानबाट त्रिभुवन विमानस्थलमा ओर्लिनेबित्तिकै सुन्दरीजलमा लगी फेरि बन्दी बनाइएको थियो । यसअघि तत्कालीन राजा महेन्द्रले २०१७ साल पुस १ गते नेपाल तरुण दलको कार्यक्रममा सम्बोधन गर्ने क्रममा तत्कालीन प्रधानमन्त्री बिपी कोइरालालगायत कांग्रेसका नेतालाई पक्राउ गरी जेल चलान गर्नुका साथै प्रजातन्त्र अपहरण गरी एकदलीय पञ्चायती व्यवस्थाको सूत्रपात गरेका थिए ।
शाही ‘कु’पछि कांग्रेस नेतालाई करिब तीन महिना सिंहदरबारमा बन्दी बनाई सोही वर्षको फागुन २६ गते सुन्दरीजलस्थित नेपाली सेनाको आर्सनलका हाकिमको निवास स्थानमा पर्खालले घेरी स्थानान्तरण गरिएको थियो । नेपालमा केही समय जेल जीवन बिताइसकेपछि वि।सं। २०२५ मा भारत प्रवासमा गएका कांग्रेस नेता राष्ट्रियतामाथि खतरा देखिएपछि आठ वर्षे प्रवास जीवन त्यागेर राष्ट्रिय एकता तथा मेलमिलाप नीति लिँदै २०३३ पुस १६ गते स्वदेश फर्किएका थिए । सोही अवस्थादेखि नै नेपाली कांग्रेसले पुस १६ गतेलाई हरेक वर्ष ‘राष्ट्रिय एकता तथा मेलमिलाप दिवस’का रूपमा मनाउँदै आएको छ ।
