कनकाई खबर \ सुरुङ्गा जेसीजले संचालन गर्न लागेको प्रदेश १ पालिका स्तरीय कनकाई कप लिग नकआउट खुल्ला भलिबल प्रतियोगिताको सम्पूर्ण तयारी पूरा भएको छ ।
सुरुङ्गास्थित कनकाई माविको खेल मैदानमा आज शनिवारदेखि संचालन हुने प्रतियोगिताको स्थानीय सरकार कनकाई नगरपालिकाका प्रमुख राजेन्द्र पोखरेलले उद्घाटन गर्ने कार्यक्रम रहेको बताइएको छ ।
जेसीजको आयोजना साथै रोटरी क्लव अफ सुरुङ्गा सह–आयोजक रहेको प्रतियोगिता पुष १७ गते शनिवार संचालन भई २१ गते वुधबार समापन हुने आयोजक समितिका खेल संयोजक विवेक शिवाकोटीले बताए । प्रतियोगितामा प्रदेश १ का उत्कृष्ट ६ वटा पालिकाको भलिबल टिमले सहभागिता जनाउँने भएका छन् ।
पाहुना टोली भोजपुरको आमचोक गाउँपालिका, मोरङको बेलबारी नगरपालिका र झापाका दमक, भद्रपुर, कनकाई नगरपालिका र झापा गाउँपालिकाको भलिबल टिमले सहभागीता जनाउने खेल संयोजक शिवाकोटीले जानकारी दिए । प्रतियोगितमा प्रथम हुने टिमलाई १ लाख १ हजार १ सय ११ नगद, दोस्रो हुने टिमलाई ५१ हजार १ सय ११, तेस्रो हुने टिमलाई २५ हजार ५ सय ५५ रुपैयाँ, प्रमाण–पत्र र मेडल प्रदान गरिने आयोजक समिति सुरुङ्गा जेसीजकी महासचिव मेनुका उप्रेतीले जानकारी दिएकी छन् ।
खेल सम्पन्न गर्न ९ लाख १६ हजार ७ सय ७७ रुपैंयाँ खर्च अनुमान गरिएको छ भने खेलप्रति युवाहरुलाई प्रोत्साहन गर्ने उद्येश्यले स्थानीय सरकार कनकाई नगरपालिकाले १ लाख ५० हजार आर्थिक सहयोग गर्ने भएको छ । प्रतियोगिता सम्पन्न गर्न मुख्य प्रायोजकका रुपमा रहेको नेपाल बहुउद्येश्यीय सहकारी संस्था लि. ले १ लाख ५० हजार प्रायोजन गर्ने भएको छ । त्यस्तै सह—प्रयोजकका रुपमा मेचीनगरका नरेन्द्र मेचे रहेका छन् । प्रथम पुरस्कारको राशी युवा व्यवसायी विकाश प्रसाईंबाट आफ्नो भाइ स्व. विनोद प्रसाईँको स्मृतिमा प्रायोजन हुने सुरुङ्गा जेसीजकी अध्यक्ष यदुका उप्रेती(उषा) ले जानकारी दिएकी छन् । प्रतियोगिताको तेस्रो पुरस्कार गैरआवासीय नेपालीहरुको संस्था एनआरएनएका बोर्ड डाइरेक्टर आशिष संग्रौलाले प्रायोजन गर्ने गरी तयारी भएको अध्यक्ष उप्रेतीले जनाएकी छन् । प्रतियोगिताकालागि झापा क्षेत्र नं.४ का संघीय सांसद एलपी साँवा लिम्बूबाट समेत सहयोग प्राप्त हुने बताइएको छ ।
विगतमा सुरुङ्गा गोल्ड कप फुटबल प्रतियोगिता संचालन गरेर चर्चा कमाएको जेसीजले अब भलिबल खेललाई आफ्नो वार्षिक कार्यक्रमका रुपमा निरन्तरता दिने भएको बताइएको छ ।
