कनकाई खबर / झापाको सुरुङ्गा क्षेत्रमा रहेका पाँचवटा विभिन्न देवमन्दिर र एउटा भजन मण्डलीलाई सुरुङ्गाका युवा सामाजिक अभियन्ता आशिस संग्रौला र दिपा ओलीले सहयोग स्वरुप ८० थान कुर्सी र एक थान एम्प्लीफायर हस्तान्तरण गर्नुभएको छ ।
रोट्रयाक क्लव अफ सुरुङ्गाले होटल डिलाइटमा आयोजना गरेको एक संक्षिप्त कार्यक्रममा संग्रौला दम्पतीले सहयोग सामाग्री हस्तान्तरण गर्नुभएको हो । क्लवका अध्यक्ष दिपेन ओलीको सभापतित्व एवम् रोटरी क्लव अफ कनकाई सुरुङ्गाका अध्यक्ष सुशिल श्रेष्ठको प्रमुख आतिथ्य रहेको कार्यक्रममा विभिन्न देव मन्दिरका प्रमुख तथा प्रतिनिधिहरुको सहभागिता रहेको बताइएको छ । कुर्सी प्राप्त गर्ने देवमन्दिरहरुमा सुरुङ्गा क्षेत्रका सिद्धेश्वर शिव पञ्चायन मन्दिर, रामजानकी , गोकर्णेश्वर शिवालय, दुर्गापाञ्चायन, शिवालय मन्दिर र लक्ष्मी किर्तन मण्डली रहेका छन् । किर्तन मण्डलीलाई भजन गर्न सहज होस् भनेर एउटा एम्प्ली फायर हस्तान्तरण गरेको बताइएको छ ।
कनकाई ३ स्थित सुरुङ्गामा स्थायी बसोबास भएपनि बैदेशिक रोजगारीका सिलसिलामा विगत ७ वर्षदेखि अमेरीका बस्दै आउँनुभएका सामाजिक अभियन्ता आशिस र दिपाले धार्मिक मठमन्दिरमा कुर्सीको आवश्यक्तालाई महसुश गरेर आँफूहरुले कुर्सी सहयोग गरेको बताउँनुभएको छ ।
गैरआवासीय नेपालीहरुको संस्था एन.आर.एन.ए.(यु एस ए) का बोर्ड अफ डाइरेक्टर साथै नेपाली रविन हुड्का अध्यक्ष समेत रहनुभएका आशिस र आरएन (युएसए) रबिन हुड्की सदस्य रहनुभएकी दिपाले यस अघि पनि विभिन्न सामुदायिक विद्यालयमा रहेका विद्यार्थीहरुलाई न्यानो कपडाका रुपमा सुइटर वितरण गरिसक्नु भएको छ । चाँडै कनकाई माईस्थित कोटीहोम क्षेत्रमा रहेको वृद्धाआश्रमका जेष्ठ मातापितालाई न्यानो कपडा वितरण गर्ने योजना रहेको संग्रौलाले बताउँनुभयो ।
दाता संग्रौला दम्पतीले गरेको सहयोगप्रति खुशी व्यक्त गर्दै रोटरी क्लव अफ सुरुङ्गाका निवर्तमान अध्यक्ष टिकाप्रसाद जमरकट्टेल, कनकाई सामुदायिक वन समूहका अध्यक्ष ख्याम ओलीले शुभकामना व्यक्त गर्नुभयो । यसका साथै सामाग्री प्राप्त गर्ने मन्दिर तर्फका प्रमुख तथा प्रतिनिधिहरु निलकृष्ण सेड्याइँ, पूर्णलाल श्रेष्ठ, गोपीचन्द्र उप्रेती,मेनुका मैनाली लगायतले दाता परिवारको पवित्र कार्यको प्रशंसा गर्नुभएको थियो । रोट्रयाक क्लवकी सदस्य प्रतिक्षा ढुङ्गेलले स्वागत गरेको औपचारिक कार्यक्रमको संचालन रोट्रयाक क्लवकी सचिव सारिका गिरीले गर्नुभएको थियो ।
