कनकाई खबर \ झापाको कनकाई नगरपालिकाको १० औं नगर सभा सम्पन्न भएको छ ।
कनकाई नगरपालिकाका प्रमुख राजेन्द्र पोखरेलको सभापतित्वमा सम्पन्न नगर सभालाई सम्बोधन गर्दै नगर प्रमुख पोखरेलले आफ्नो पाँच वर्षे कार्यकालको उत्तराद्र्धको नगर सभा भएकोले यो नगर सभा आँफैमा ऐतिहासिक भएको बताए ।
निर्वाचनका बेला आँफूले गरेको प्रतिवद्धता यो पाँचवर्षे कार्यकालमा पूरा गर्न आफ्नो नेतृत्वमा रहेको टिमले धेरै ठूलो संघर्ष गरेको भन्दै कनकाई नगर प्रमुख पोखरेलले नगरका सम्पूर्ण जनप्रतिनिधिप्रति आभार प्रकट गरे । टिम मिल्दा काम गर्न पनि सहज हुने भन्दै नगर प्रमुख पोखरेलले स्थानीय सरकारका रुपमा रहेको कनकाई नगरपालिकाको जनप्रतिनिधिहरुको यति राम्रो टिम मिलाइदिने सम्पूर्ण नगरवासीहरुलाई समेत धन्यवाद ज्ञापन गरे ।जनप्रतिनिधिहरुले कनकाई नगरपालिकाको नेतृत्व सम्हाले यता नगर क्षेत्रमा सडक बाटो, बिजुलीबत्ती, पिउने पानी, कृषि, शिक्षा, स्वास्थ्य, भौतिक पूर्वाधार , युवा स्वरोजगार लगायतका क्षेत्रमा ठूलो प्रगति हुँदै आएको भन्दै नगर प्रमुख पोखरेलले अझै पनि गर्नु पर्ने काम धेरै बाँकी रहेको बताए ।
निर्वाचनका समयमा गरेको प्रतिवद्धता मध्ये ऐलानी प्रति जग्गाको धनीपूर्जा वितरणका विषयमा समेत कनकाई नगरपालिकाले प्रयास गरिरहेको बताउँदै नगर प्रमुख पोखरेलले कुनै बाधा व्यवधान आएमा पनि नाप नक्सा सबै गरिसकेर जोतभोगको प्रमाणका आधारमा स्थानीय तहले दिन मिल्ने सम्मको जोतभोगको आधारमा दिइने प्रमाण पत्र वितरण गरेर विदा हुने बताए । अघिल्ला वर्षहरुमा बेरुजु शुन्य बनाएको कनकाई नगरपालिकाको गत वर्षमा १.६६ बेरुजु आएको भएपनि चालु वर्षमा बेरुजु शुन्य पार्ने गरी गतिविधि संचालन गर्न समेत नगर प्रमुख पोखरेलले सम्पूर्ण जनप्रतिनिधि साथै कर्मचारीहरुलाई अनुरोध गरेका छन् ।
नगरपालिकाका कर्मचारी लक्ष्मीप्रसाद अधिकारीले नगरपालिकाको समग्र कारोबारको झलक प्रस्तुत गरेका थिए । स्थानीय तहमा विभिन्न कारणबाट बेरुजु देखिने अवस्थाका बारेमा प्रष्ट पार्दै कर्मचारी अधिकारीले हाल सम्मको कनकाई नगरपालिकाको बेरुजुको अवस्थाका बारेमा जानकारी गराएका थिए । अहिले सम्म देखा परेको बेरुजुलाई समपरीक्षणबाट हटाउँन आवश्यक कागजात पेश गर्ने सम्बन्धमा नगर सभाले निर्णय गरेको बताइएको छ ।
कनकाई नगरपालिकाकी उपप्रमुख मन्जु प्रसाईले स्वागत गरेको कार्यक्रममा नगरपालिकाका प्रमुख प्रसाशकीय अधिकृत मोहनप्रसाद न्यौपानेले सहजीकरण गरेका थिए ।
