कनकाई खबर \ झापाको बिर्तामोडस्थित बीएण्डसीमा कोरोना संक्रमणका कारण भर्ना भएकी इलाम ७ की ४५ वर्षीय गीता सुवेदीको पाँच महिनापछि मंगलबार डिस्चार्ज भएको छ ।
अक्सिजनको मात्रा कम भएर श्वासप्रश्वासमा समस्या भएपछि २०७८ साउन १९ गते गीतालाई इलामबाट उपचारका लागि बीएण्डसी ल्याईएको थियो । त्यहि दिन भएको एन्टिजेन परिक्षणबाट उनलाई कोरोना पोजेटिभ देखिएको थियो । कोरोना पोजेटिभसँगै अक्सिजन कम, फोक्सोको समस्या र सुगर पनि नघटेपछि चिन्ताजनक अवस्थामा गीतालाई सुरुदेखि नै भेन्टिलेटरमा राखेर उपचार गरिएको बिएण्डसीका कोभिड विभाग प्रमुख डा. राजु श्रेष्ठले बताए । केही दिनपछि कोरोना संक्रमण निकोभएपनि कालो ढुसीको संक्रमण देखा परेपछि अवस्था चिन्ताजनक भएकाले निरन्तर भेन्टिलेटरमा राखेर भएको उपचार आज सफल भएको गीताको उपचारमा सम्लग्न डा.श्रेष्ठले पत्रकार सम्मेलन मार्फत जानकारी दिए । डिस्चार्जसँगै मंगलबार अस्पतालमा आयोजित पत्रकार सम्मेलनमा बिएण्डसीमा पहिलो पटक कालोढुसीको सफल उपचार भएको जनाइएको छ । डा.श्रेष्ठका अनुसार गीतालाई अस्पतालमा भर्ना भएदेखि निरन्तर ९९ दिन सम्म भेन्टिलेटरमा राखेर उपचार गरिएको हो ।
शुरुका दिनमा गीतालाई प्रतिमिनेट ६० लिटरसम्म अक्सिजन दिनु परेको डा.श्रेष्ठले बताए । ‘यो केश हाम्रालागि पनि चुनौति भयो,’ डा. श्रेष्ठले भने, ‘कोरोना पछि कालो ढुसीको संक्रमण भएको बिरामी हामीले पहिलो पटक उपचार गरेका हौं ।’ अझै केही समयसम्म प्रतिमिनेट २ देखि ३ लिटरसम्म अक्सिजनको आवश्यक पर्ने र त्यसको व्यवस्थापन परिवारले घरबाटै मिलाउँने भएपछि अस्पतालबाट बिदा गरेको डा. श्रेष्ठले जानकारी दिए ।
‘करीब १५ दिनको उपचार पछि कोरोना संक्रमण मुक्त बनाउन सकियो,’ अस्पतालका मेडिसिन विभागका प्रमुख डा.लक्ष्मण ठाकुरले भने, ‘बिरामीको फोक्सो खुम्चिएको र पूर्ण रुपमा काम गर्न नसक्ने भएकाले अवस्था गम्भिर थियो, हामीले जानेको सबै उपचार र प्रविधिको प्रयोग गर्यौं र आज बिरामी बचाउन सकियो ।’ गीताको परिवार र उनका श्रीमानले देखाएको धैर्यताले नै बिरामी बाँच्न सफल भएको डा. ठाकुरले बताए । ‘हाम्रो समाजमा लामो समय भेन्टिलेटरमा राखेर उपचार गराउने चलन छैन,’ डा. ठाकुरले भने, ‘यसमा परिवार र खासगरी बिरामीको श्रीमानले गरेको सेवाले नै आज बिरामी घर पठाउन पाएका छौं ।’
अस्पतालमा आयोजित पत्रकार सम्मेलनमा गीताका श्रीमान रामजी सुवेदी (सुमन) ले बीएण्डसीका सञ्चालक दुर्गा प्रसाई, डाक्टरहरु, स्वास्थ्यकर्मी, अस्पताल व्यवस्थापन लगायत कर्मचारीहरुलाई धन्यवाद दिए । ‘परिवारले माया मारेको थियो,’ उनले भने ‘तर मैले धैर्य छोडिन, अन्तिम समयसम्म पनि उपचार गराउँछु भनेर अस्पतालमै राखेको कारण श्रीमतीको जीवन बाँच्यो ।’
बीएण्डसीका मेडिकल डाइरेक्टर डा.बिरेन्द्र यादव, कोभिड विभाग प्रमुख डा. राजु श्रेष्ठ, मेडिसिन विभाग प्रमुख डा.लक्ष्मण ठाकुर, स्वास्थ्यकर्मी गंगा अधिकारी लगायतका डाक्टर साथै स्वास्थ्यकर्मीहरुको टिमले विरामी गीताको १४३ दिन सम्मको निरन्तर उपचारपछि यो सफलता प्राप्त भएको अस्पतालका जनसम्पर्क अधिकारी प्रोमिस गिरीले जानकारी दिए । कोरोना संक्रमणको प्रारम्भदेखि यहि पुस १३ गतेसम्ममा ३ हजार ४ सय २३ जना संक्रमितहरुलाई उपचार गर्दा ८५ दशमलब ५ प्रतिशत सफलता हात परेको पत्रकार सम्मेलनमा गिरीले जानकारी दिए ।
