कनकाई खबर / नेकपा एमालेका केन्द्रिय अध्यक्ष एवम् पूर्व प्रधानमन्त्री के.पी. शर्मा ओलीलाई गृह जिल्ला झापाको सुरुङ्गामा भव्य स्वागत गरिएको छ ।
पारिवारीक भेटघाटकालागि झापाको सुरुङ्गास्थित श्यामसुन्दर ओलीको निवासमा आएका पूर्व प्रधानमन्त्री ओलीलाई सुरुङ्गा आसपासको क्षेत्रका नेता तथा कार्यकर्ताले स्वागत गरेका हुन् । ओलीको राजनीतिक यात्रा प्रारम्भ भएको झापाको सुरुङ्गामा पारिवारीक भेटघाटको क्रममा कनकाई —३ सुरुङ्गाका श्यामसुन्दर र सकुन्तला साथै छोरी खुस्बु ओलीको निवासमा आएका एमाले अध्यक्ष एवम् पूर्व प्रधानमन्त्री ओलीलाई भुमिका र जयकुमारी ओली, खगेन्द्रमणि र पार्वता ओली, विपिन र रेणु ओली, प्रिन्स, सौर्यविक्रम, सर्वाहानी साम्राज्ञी ओली लगायतका ओली पारिवारका सदस्यहरुले स्वागत गरेका थिए ।
त्यस्तै नेकपा एमालेको कनकाई नगर कमिटीका अध्यक्ष खड्गप्रसाद प्रसाई लगायत अन्य पदाधिकारीहरु, कनकाई नगरपालिकाकी उपप्रमुख मन्जु प्रसाईँ लगायत कनकाई नगरक्षेत्रका जनप्रतिनिधिहरु, केन्द्रिय सल्लाहकार परिषद सदस्यहरु, प्रदेश सभा सदस्य हिराकुमार थापा लगायत पार्टीका प्रदेश कमिटीका सदस्यहरु, जिल्ला तथा क्षेत्रीय स्तरका नेता तथा स्थानीय कार्यकर्ताहरुले भेटघाट तथा स्वागत गरेको नेकपा एमाले कनकाई नगर कमिटीका सचिव देवीप्रसाद उप्रेतीले जानकारी दिएका छन् ।
राजनीतिमा लाग्नु अघि सुरुङ्गा, घैलाडुवा, डाँगीबारी क्षेत्रका नदी खोलामा सँगै पौडी खेलेका साथीभाइहरुलाई नजिकैबाट हेर्दा आँफू पनि बुढो भइएछ की जस्तो महसुश भएको बताउँदै पूर्व प्रधानमन्त्री ओलीले आफ्ना राजनीति सहयोद्धाहरुसँग हँस्यौली गर्दै दिल खोलेर हाँसेका थिए । आँफूले राजनीति प्रारम्भ गर्नु अघि सँगै खेलेका साथै सँगसँगै राजनीति गरेका साथीभाइहरुसँगको भेटघाटले आँफूलाई अत्यन्तै खुशी लागेको बताउँदै पूर्व प्रधानमन्त्री ओलीले झापाको कनकाई क्षेत्र सचेत नागरिकहरुको बसोबास रहेको ठाउँ भएकाले यहाँ विकास निर्माणका अझै धेरै काम गर्न सकिने बताए ।
सामाजिक जागरण, भौतिक पूर्वाधार, शिक्षा, स्वास्थ्य, कृषि लगायतका क्षेत्रमा यहाँको स्थानीय तहले महत्वपूर्ण काम गर्दै आएको बताउँदै एमाले अध्यक्ष एवम् पूर्व प्रधानमन्त्री ओलीले खास गरी युवा सर्कल केही फरक ढङ्गले अघि बढ्न खोजेकाले यो शक्तिलाई प्रोत्साहन दिनु पर्ने तर्फ उनको जोड थियो ।
