कनकाई खबर \ कृषिबाट उत्पादित सामाग्रीलाई बजारीकरण गर्ने साथै कृषिबाटै आत्मनिर्भर बन्न नगरबासीलाई प्रेरित गर्ने उद्येश्यले झापाको कनकाई नगरपालिकाले कृषि बजार संचालन गर्ने भएको छ ।
कृषिबाटै नगरबासीलाई स्वरोजगार बनाउँने दिर्घकालीन योजनाका साथ संचालन गर्न लागेको कृषि बजार व्यवस्थापनकालागि कनकाई नगरपालिकाले १ विगाहा ७ कठ्ठा जमीनमा सटर निर्माणकालागि निर्माण व्यवसायीसँग सम्झौता भइसकेको कनकाई नगरपालिकाका प्रमुख राजेन्द्र पोखरेलले बताए । पहिलो चरणमा निर्माण हुने १ सय ५० वटा सटरमा सागसब्जी, फलफूल साथै व्यवस्थित माछा मासु पसल रहने बताइएको छ । सुरुङ्गा बजारको उत्तर तर्फ लोकमार्गसँगैको पशुहाट संचालन भएको आसपासको क्षेत्रफलमा कृषि बजार संचालन हुने नगर प्रमुख पोखरेलले जानकारी दिए ।
कृषि बजार संचालनकालागि कनकाई नगरपालिकाले नेपाल कृषि बजार विकास कार्यक्रम (सहज) सँग सम्झौता पत्रमा हस्ताक्षर गरेको छ । कृषि क्षेत्रमा सार्वजनिक निजी साझेदारी सहजीकरणकालागि समझदारी पत्रमा हस्ताक्षर भएको हो । कनकाई नगरपालिकामा आज (विहिबार) आयोजित एक संक्षिप्त कार्यक्रमका विच हस्ताक्षर भएको समझदारी पत्र कनकाई नगरपालिकाका प्रमुख राजेन्द्र पोखरेल र परियोजनाका तर्फबाट रिमा श्रेष्ठ विच आदान प्रदान गरिएको छ । कृषि बजार संचालनमा आएसँगै उत्पादन भएका कृषिजन्य सामाग्रीहरुको बजारीकरण सहज हुने भएको छ । उत्पादनसँगै उचित मूल्य प्राप्तीकालागि सहजीकरण गर्ने परियोजनाको उद्येश्य रहेको नेपाल कृषि बजार विकास कार्यक्रमकी सहायक प्रमुख रिमा श्रेष्ठले जानकारी दिएकी छन् ।
सन् २०२१ देखि २०२४ सम्म कनकाई नगरपालिकासँग साझेदारीमा काम गर्ने गरी सम्झौता गरेको कृषि बजार विकास कार्यक्रम (सहज)ले कनकाईमा संचालन हुने कृषि बजार व्यवस्थापनकालागि ५५ लाख रुपैंयाँ लगानी गर्ने सम्झौता भएको कनकाईका कृषि विकास अधिकृत यदु उप्रेतीले बताए ।
